काठमाडौं । नेपाली कांग्रेसका नेता शेखर कोइराला माओवादी केन्द्रका अध्यक्ष पुष्पकमल दाहाल (प्रचण्ड) नेतृत्वको सरकारमा परराष्ट्र मन्त्रालय नपाए सरकारमा नजाने तयारीमा छन् ।

कोइरालाका स्वकीय सचिव दिनेशचन्द्र थपलियाले पनि सो कुराको पुष्टि गर्दै अहिले छलफलकै चरणमा रहेको बताए । “परराष्ट्र नपाए सरकारमा नजाने उहाँको पहिलेदेखिकै अडान हो,” उनले बाह्रखरीसँग भने ।

उता, नेपाली कांग्रेसका सभापति शेरबहादुर देउवाले आफू निकटका नेता विमलेन्द्र निधिलाई पार्टीको तर्फबाट सरकारको नेतृत्वमा पठाउने तयारी गरेका छन् । महाधिवेशनमा सहयोग गरेका नेता अर्जुननरसिंह केसीले पनि सभापति देउवालाई भेटेरै आफूलाई उपप्रधानमन्त्री बनाउनुपर्ने दबाब दिएको उच्च स्रोतले जानकारी दियो ।

देउवा निकट अर्का नेता प्रकाशशरण महतले पनि केसी सरकारमा जाने भए आफू पनि जान पाउनुपर्ने अडान राख्दै आएका छन् । “दबाबै दबाबका कारण सभापतिलाई निर्णय गर्न गाह्रो भएको छ,” देउवा निकट एक नेताले बाह्रखरीसँग भने । देउवाले भने अन्तिम समयमा निधिलाई नै सरकारमा पठाउने निर्णय लिने उनी निकट विश्वस्त स्रोतले जानकारी दिएको छ ।