काठमाडौं । नेपाल कम्युनिस्ट पार्टी (नेकपा)का दुई अध्यक्ष केपी शर्मा ओली र पुष्पकमल दाहाल (प्रचण्ड)बीच भेटवार्ता भएको छ ।
प्रधानमन्त्री ओलीको निवास बालुवाटारमा भएको भेटवार्तामा एमसीसी, संविधान संशोधनका लागि कार्यदल गठन र अन्य विविध विषयमा छलफल भएको बताइएको छ ।
यद्यपि प्रधानमन्त्रीको प्रेस सल्लाहकार सूर्य थापाले नियमित भेटघाट मात्र भएको र मूर्त रूपमा विषय केन्द्रित छलफल नभएको बताए ।
“दुई अध्यक्षबीच नियमित भेटघाट भइरहन्छ । त्यसैको निरन्तरता हो, विषयमै केन्द्रित रहेर कुनै कुराकानी भएको छैन,” उनले बाह्रखरीसँग भने ।
राष्ट्रियसभा सदस्य पनि प्रधानमन्त्री बन्न मिल्ने गरी संविधान संशोधनका लागि कार्यदल गठन गरेपछि नेकपा भित्र र बाहिर तरङ्ग उत्पन्न भएको छ ।
त्यस्तै सचिवालयमा कार्यदलले पेस गरेको मिलेनियम च्यालेन्ज कम्प्याक्ट (एमसीसी) प्रस्ताव विचाराधीन छ ।