काठमाडौं । उपत्यकाको सवारी आवागमनलाई सहज बनाउन सूर्यविनायक– जडिबुटी सडकखण्डमा यात्रुवाहक तथा मालवाहक सवारी साधन र कम गतिमा गुड्ने सवारी साधनहरु बायाँ लेनबाट तथा निजी सवारी साधनहरु दायाँ लेनबाट मात्रै चलाउनुपर्ने भएको छ ।

फागुन १४ गतेदेखि यो व्यवस्था लागु गरिने ट्राफिक महाशाखाले जनाएको छ ।

प्रहरी उपरीक्षक जिवनकुमार श्रेष्ठको अध्यक्षतामा गठित सुझाव समितिले दिएको सुझावअनुसार विस्तारै गुड्ने सवारी साधन बायाँ लेनबाट र तीव्र गतिमा गुड्ने सवारी साधन दाहिने लेनबाट गुडाउनुपर्ने व्यवस्था गरिएको हो ।

महाशाखाका प्रमुख प्रहरी वरिष्ठ उपरीक्षक भीमप्रसाद ढकालले सवारी साधनहरुले जथाभावी लेनको प्रयोग गरेर सवारी साधन चलाउने तथा लेन परिवर्तन गर्ने, लुकिङ ग्लास र साइड लाइटको प्रयोग नगरी जथाभावी ओभरटेक गर्ने, तीव्र गतिमा सवारी चलाउनेलगायतका असावधानीले दुर्घटनाको जोखिम बढ्ने हुनाले त्यस्तो सडकमा गुड्ने सवारी र सडकको अवस्था हेरि सुरक्षित तरिकाले निर्धारित लेनमा तोकिएको गतिमा मात्र सवारी चलाइ सुरक्षित आवागमन हुनेमा आफू विश्वस्त रहेको बताए ।