काठमाडौं । विशेष अदालतमा ५३८ थान मुद्दा सुनुवाइको पर्खाइमा छन् । जसमा अधिकांश मुद्दा पछिल्लो १८ महिनामा दायर भएका छन् ।
विशेष अदालतमा पछिल्लो डेढ वर्षमा मात्र ४८८ थान मुद्दा दर्ता भएका छन् । दुई वर्षभित्रको २९ थान र २ वर्ष नाघेका २१ थान मुद्दा विशेष अदालतमा विचाराधीन छन् । ३८ थान थुनुवा मुद्दा छन् । ३० जना प्रतिवादी थुनामै छन् । जसमध्ये १० जना विदेशी छन् ।
विशेष अदालतले गैरकानुनी सम्पत्ति आर्जन, अनियमितता, नक्कली प्रमाणपत्र, घुस, राज्यविरुद्धको अपराध र सम्पत्ति शुद्धीकरणसम्बन्धी मुद्दा विशेष अदालतले हेर्ने गर्छ । अख्तियार दुरुपयोग अनुसन्धान आयोग र सम्पत्ति शुद्धीकरण विभागले विशेष अदालतमा मुद्दा दायर गर्छन् ।
बढी मुद्दा घुसका
विशेष अदालतमा सबैभन्दा धेरै मुद्दा घुससम्बन्धी छन् । घुससम्बन्धी मात्र २६४ थान मुद्दा विचाराधीन छन् । त्यसपछि निर्णयगत अनियमिततासम्बन्धी १७४ थान मुद्दा सुनुवाइको पर्खाइमा छन् । गैरकानुनी सम्पत्ति आर्जनसम्बन्धी २४ थान, नक्कली प्रमाणपसम्बन्धी ५९ थान, सम्पत्ति शुद्धीकरणसम्बन्धी १६ थान मुद्दा विशेष अदालतमा छन् ।
फागुन महिनामा मात्र विशेष अदालतले २५ थान मुद्दा फछ्र्योट गरेको छ । फागुन महिनामा २१ प्रतिशत मुद्दा फछ्र्योट गर्ने लक्ष्य राखिएको छ ।