तेहरान । इरानमा कोरोनाका कारण मृत्यु हुनेको संख्या ६ पुगेको छ भने दर्जनभन्दा बढी संक्रमित भएको अधिकारीहरुले जनाएका छन् । कोरोनाको संक्रमण नियन्त्रणका लागि त्यहाँका विद्यालय, विश्वविद्यालयहरु र सांस्कृतिक केन्द्रहरु बन्द गरिएका छन् ।
मारकाजी प्रान्तका गर्भनर अलि अघाजादेहले शनिबार बेलुका केन्द्र सहर अराकमा मृत्यु भएकाहरु कोरोना संक्रमित भएको बताएका थिए । इरानको समाचार संस्था आईआरएनएलाई बताउँदै गर्भनर अलिले उनीहरुमा मुटुको समस्यासमेत देखिएको बताएका थिए ।
उनका अनुसार इरानमा २८ जनामा कोरोना संक्रमणको पुष्टि भएको छ । कोरोनाका कारण मृत्यु भएका सबै इरानी भएको बताइएको छ ।
गत वर्षको अन्त्यतिर डिसेम्बरमा चीनको वुहानबाट सुरु भएको कोरोनाका कारण २३ सय ४५ जनाको मृत्यु भइसकेको छ भने २६ भन्दा बढी मुलुकमा फैलिइसकेको छ ।
दक्षिण कोरियामा उच्च सतर्कता !
कोरोनाको संक्रमण तीव्र रुपमा वृद्धि भएपछि दक्षिण कोरियामा उच्च सतर्कता अपनाइएको छ । दक्षिण कोरियाका राष्ट्रपति मुन जाइ-इनले 'मुलुकले गम्भीर अवस्थाको सामना गर्नुपरेको र आगामी दिन थप चुनौतीपूर्ण हुने' बताएका छन् ।
दक्षिण कोरियामा कोरोनाका कारण पाँच जनाको मृत्यु भइसकेको छ भने ६ सयभन्दा बढी संक्रमित बनेका छन् ।
दक्षिण कोरियाले एक साताका लागि विद्यालय बिदा लम्ब्याउने घोषणा गरेको छ ।
आइतबार मात्र दक्षिण कोरियामा एक सय ६९ जनामा संक्रमण भेटिएको थियो । -बीबीसीर अलजजिरा