युरोपमा सबभन्दा बढी प्रभावित क्षेत्र इटालीमा नोभेल कोरोना भाइरस नियन्त्रणका लागि 'अतिरिक्त उपाय' अवलम्बन गरिएको छ । प्रधानमन्त्री ज्युसेपे कोन्टेले शनिबार आपतकालीन योजना सार्वजनिक गर्दै 'कडा प्रतिबन्ध' को घोषणा गरेका हुन् ।
इटालीमा कोरोना संक्रमितको संख्या ७९ पुगेको छ । कोभिड-१९ को संक्रमणका कारण दुई जना इटालीयनको मृत्यु भएपछि सरकारले इटालीमा कडा प्रतिबन्धको घोषणा गरेको हो ।
सरकारको उक्त आपतकालीन योजना अन्तर्गत उत्तरी क्षेत्रमा पर्ने लोम्बार्डफ र भेनेटोलाई क्वारेन्टाइन गरिएको हो । अधिकारीका अनुसार उक्त दुई सहरका करिब ५० हजार मानिसहरुलाई घर बाहिर ननिस्किन आग्रह गरिएको छ ।
प्रधानमन्त्री कोन्टेले भने, "कोरोना प्रकोप भएका क्षेत्रमा प्रवेश गर्न र त्यहाँबाट अनयत्र जान प्रतिबन्ध लगाइएको छ । तर, विशेष परिस्थितिमा भने उक्त प्रावधान लागु हुनेछैन ।"
उक्त क्षेत्रका सम्पूर्ण विद्यालयहरु बन्द गरिएका छन् भने खेल कार्यक्रमहरु स्थगित गरिएका छन् । आइतबार उक्त क्षेत्रमा विभिन्न फुटबल सिरिजहरु हुने तय भएको थियो ।
प्रहरी र आवश्यक परेमा सेना परिचालन गरिने अधिकारीहरुले बताएका छन् । इटालियन अधिकारहरु आइसोलेटेड क्षेत्रभन्दा बाहिर कोरोना फैलिइसकेकोले त्यसलाई नियन्त्रणमा लिन समस्या हुनेमा त्रसित बनेका छन् । - बीबीसी