काठमाडौं । गएको मंसिर १४ देखि २४ गते सम्म नेपालमा १३ औँ साग भव्य रुपमा सम्पन्न भयो । घरेलु मैदानमा आयोजना भएको सागमा नेपालले ऐतिहाँसिक सफलता हात पार्न सफल भयो । सागमा नेपालले ५१ स्वर्ण, ६० रजत तथा ९५ कास्यसहित कूल २०५ पदक जित्न सफल भयो । नेपालले सागमा उत्कृष्ट प्रदर्शन गर्दै दोस्रो स्थान हासिल गर्‍यो । नेपालको ऐतिहासिक सफलता पछि खेलाडीहरुले धेरै मेहेनत गर्न परेको थियो । नेपाली खेलाडीले गरेको मेहेनत र सफलतालाई प्रोत्साहन गर्दै प्रधानमन्त्री केपी वलीले गत मंसिर २५ गते नेपाली खेलाडीहरुलाई पुरस्कारको घोषणा गरे ।

वलीले नेपाली खेलाडीले ठूलो सफलता हात पारेको बताउँदै मोटो रकमको घोषणा गरे । उनले एक स्वर्ण विजेताले ९ लाख, दुईभन्दा बढी जित्नेले एक स्वर्ण बराबर ११ लाख प्राप्त गर्ने तथा रजत विजेताले ६ लाख र कास्य विजेताले ३ लाख प्राप्त गर्ने घोषणा गरे । प्रधानमन्त्रीले पुरस्कार रकम घोषणा गरेको तीन महिना पुग्न लाग्दा पनि हाल सम्म खेलाडीले पुरस्कार रकम पाएका छैनन् । सरकारले दिने भनेको पुरस्कार रकम समयमै नपाउँदा, रकम पाउने हो या होइन भन्ने कुरामा अन्योल भएको खेलाडीहरुको गुनासो छ । उनीहरु सरकारले पुरस्कार समयमै नदिँदा समस्यामा परेको पनि बताउँछन् ।

“पुरस्कार रकम घोषणा गरेको तीन महिना पुग्न थाल्यो । रकम कहिले पाउने हो भन्ने आज सम्म पनि जानकारी छैन् । पुरस्कार रकम घोषणा गरेको दिन देखि आज सम्म कुनै निकायबाट कहिले पाउने भन्ने विषयमा पनि जानकारी आएको छैन् । अब त पुरस्कार रकम बासि भात खाए सरह हुनेभयो,” सागमा करातेतर्फ स्वर्ण विजेता खेलाडी अनु अधिकारीले भनिन् ।

त्यस्तै सागमा  बक्सिङतर्फ स्वर्ण विजेता सनिल शही पनि पुरस्कार रकमको पर्खाइमा छन् । प्रदेश नम्बर तीनबाट छनोट हुँदै सागमा सहभागिता जनाएका उनलाई यो पुस्कारले खेल जीवनमा केही सफलताको महसुश दिलाएको थियो । तर, घोषणाको तीन महिना पुग्न लाग्दा पनि पुरस्कार रकम हातमा नपर्दा उनी अहिले दुखि छन् ।

“घोषणा भएको दिन नि धेरै भइसक्यो । आज सम्म कसैले केही जानकारी गराएको छैन् । न खेलकुद परिष्द न मन्त्रालय । खेल संघहरुले पनि यस विषयमा कुनै जानकारी गराएको छैनन् । लामो समय सम्म पुरस्कार नपाउँदा पुरस्कार रकमा नै संका लाग्न थालेको छ,” सनिलले भने ।

उता पुरस्कार रकम प्रति राष्ट्रिय खेलकुद परिष्द पनि अनविज्ञ छ । उसोत परिसष्दका सदस्य सचिव रमेश सिलवालले साग सकिएको एक महिना पछि सबै खेलाडीहरुले पुरस्कार रकम पाउने घोषणा गरेका थिए । खेलकुद मन्त्रालयबाट नै पुरस्कार रकम नआउँदा खेलाडीलाई रकम दिन नसकेको सिलवाल बताउँछन् ।

“खेलकुद मन्त्रालयबाट ने पुरस्कार रकम आएको छैन् । मन्त्रालयबाट आउने वित्तिकै हामीले खेलाडीलाई हस्तान्तर गर्नेछौं । बिभिन्न सरकारी कामले गर्दा हस्तान्तरणमा ढिलाई भएको हो । अबको दश दिन भित्र हामीले खेलाडीलाई पुरस्कार रकम हात पार्नेछौं,” सदस्य सचिव सिलवालले भने ।