एजेन्सी । १९७९ मा तत्कालीन चिनियाँ नेता देङ सिआओपिङले आफ्ना अमेरिकी अतिथि, हेनरी किसिङ्गरसँग पश्चिममा शिक्षा पूरा गर्न जानु कुनै डरलाग्दो कुरा नभएको उल्लेख गरेका थिए । उनको सो वचनले त्यस समय धेरै ठूलो खुलासा गरेको थियो कि चिनियाँ विद्यार्थीहरु वास्तवमै कुनै समय आफ्ना शत्रुराष्ट्रकहाँ पढ्न जान अनुमति पाउनेछन् । आज हजारौँका सङ्ख्यामा प्रत्येक वर्ष चिनियाँ विद्यार्थीहरुले उच्च शिक्षा हासिल गर्न पश्चिमी राष्ट्र चुनिरहेका छन् । तर, अहिले धेरैले देङको त्यसबेलाको अभिव्यक्तिसँग सहमति जनाउँदैनन् । 

चिनियाँ निकायले पश्चिममा हुने नियमित गोलीबारीका घटनालाई धेरै ठूलो र भयानक अनि विस्तृत रुपमा प्रस्तुत गराउने हुनाले पनि उनीहरु पश्चिमी समाजसँग डराउने गर्दछन् भने पश्चिमको भेदभावपूर्ण वातावरणका कारण पनि आफूलाई सुरक्षित ठान्दैनन् । जुन अहिले जारी कारोना भाइरस संक्रमणका कारण झन ठूलो समस्या बन्ने अनुमान गरिएको बताइएको छ । 

यसबीच वाङ जुएजुन लगायतका व्यक्तित्वहरुले चाहिँ सो त्रासलाई ठूलो अवसरका रुपमा लिइरहेका छन् । उनी अन्तराष्ट्रिय राहत कार्य सम्बन्धी भेटेरान चिनियाँ हुन् र ‘सेफ्टी एनिटाइम’ का संस्थापक पनि हुन् । सो कम्पनीले विदेशमा पढाइ पूरा गर्ने तयारी गरिरहेका चिन्तित चिनियाँ नागरिकहरुका लागि सुरक्षा सम्बन्धी विभिन्न प्रशिक्षण कार्यक्रमहरु सञ्चालन गर्ने गरेको छ । 

यसमा उनका ग्राहकहरुलाई कतैपनि बन्दुक हमला भएमा, त्यसको उचित प्रतिक्रिया दिन र अपहरणको प्रयास वा आतङ्ककारी हिंसा भएमा त्यसबाट बच्न सिकाइन्छ । त्यस्तै यस प्रशिक्षणको ठूलो अंश ठग, चोरी, पाकेटमार लगायतका सामान्य खतराहरुमा पनि केन्द्रित छ । त्यस्तै फस्र्ट एड, सुरक्षा सम्बन्धी जानकारी, ड्रग्सको कानुन र यौन दुव्र्यवहार लगायतका समस्या समाधान गर्ने सुझाव पनि दिइएको हुन्छ । गत वर्ष मात्र ६ लाख ६० हजार चिनियाँ विद्यार्थी उच्च शिक्षाका लागि विदेशिएका थिए । तर सो कम्पनीमा चिनियाँ मात्र नभएर अन्य देशका छात्र अनि उर्जा, टेलिकम, वित्तिय, इन्जिनियरिङ, बेल्ट एण्ड रोड लगायत विभिन्न चिनियाँ परियोजनामा सहभागी चिनियाँ कामदार पनि प्रशिक्षण लिन आउँछन् । यसरी अधिकांश चिनियाँहरुले अफ्रिकी देश भन्दा अमेरिकाका कलेजहरु छनोट गरिरहेपनि अमेरिकाका शहरहरुमा खतरनाक सामुहिक हमलाका खबर नियमति आइरहने हुनाले उनीहरु त्यहाँको हिंसाप्रति चिन्तित रहने गरेका छन् । 

यस्तोमा वाङले आफूले दिने ट्रेनिङले चिनियाँहरुलाई त्यस किसिमको भयानक परिस्थितिबाट टाढा राख्न मद्दत गर्ने बताए । यसबारेमा १५ वर्षीय विद्यार्थी काओ जेन भन्छन्, “मलाई अमेरिकी युनिभर्सिटीमा पढाइ पूरा गर्न मन छ । तर हामीले अमेरिकी बन्दुक हिंसाका बारेमा धेरै सुनेका छौँ । यसकारण मैले यस सम्बन्धी सहज निर्णय लिन सकिरहेको छैन ।” उनको सो भनाइप्रति सँगै बसिरहेकी आमाले पनि मुन्टो हल्लाउँदै सहमति जनाइन् । 

तर वाङले भने ग्राहकहरुले आफूकहाँबाट सिकेर जाने भयानक परिस्थितिहरु वास्तविक जीवनमा कमै सामना गर्नुपर्ने दाबी गरेका छन् । उनी २०१० मा हाइटीको ठूलो भूकम्पको समयमा पनि राहत कार्यक्रममा सहभागी भएका थिए । त्यसैले उक्त प्रशिक्षण वास्तवमा भविष्यमा हुने सक्ने सबे किसिमका खतरनाक पििरस्थितिका लागि तयार राख्न र त्यसबाट जोगिने मनस्थिति विकास गराउन मात्र रहेको उनले बताए । चीन विश्वका धेरै ठाउँहरु भन्दा सुरक्षित मानिएपनि चिनियाँहरु जाने गरेका केही स्थलमा अनपेक्षित खतराको अधिक सम्भावना रहेको उनको भनाइ छ ।   द इकोनोमिस्ट