एजेन्सी । भिक्टोरियन समयदेखि नै प्रियजनहरुलाई ग्रिटिङ कार्ड पठाउने चलन छ । तर स्मार्टफोनको युगमा, ‘इमोटिकन’, टेक्स्ट म्यासेज, सामाजिक सञ्जाल अनि इमेलको बढ्दो प्रवृत्तिले ग्रिटिङ कार्डको अस्तित्व स्वाभाविक रुपमा जोखिममा पारिरहेको छ ।
तर आश्चर्यजनक रुपमा ग्रिटिङ कार्डको व्यवसाय अझै जिवित छ र अघिल्लो वर्ष नाफामा समेत रहेको तथ्याङ्कले देखाएको छ ।
पछिल्लो २५ वर्षदेखि कार्ड डिजाइनिङ गर्दै आएकी रेचल हेरले आफ्नो व्यवसायमा समयसँगै धेरै ठूला बदलाव देखेको बताइन् । तरपनि आफ्नो अनुभव अनुसार जति फेशन परिवर्तन भए पनि कार्ड र उपहार दिने चलन कहिल्यै नहट्ने उनको भनाइ छ ।
कुनै समयमा बिरामीलाई छिट्टै ठीक हुने शुभकामना दिन ग्रिटिङ कार्ड जति राम्रो विकल्प अरु कुनै थिएन ।
तर पछिल्लो समय सामाजिक सञ्जालको अत्यधिक प्रयोग र वातावरणीय चिन्ताका कारण कार्डको व्यापारमा नकारात्मक प्रभाव पर्दै आएको विज्ञहरु बताउँछन् ।
यसरी अहिलेका युवाहरु टेक्स्ट म्यासेजमै रमाउने गरेको हुनाले पनि उनीहरुले थोरै कार्ड खरिद गर्नु स्वाभाविक लाग्छ ।
तर वास्तवमा जि.सि.ए.को २०१९ बजार रिपोर्टका अनुसार बेलायती नागरिकहरुले कार्डमा खर्च गरेको १.७ अर्ब पाउन्डमा सबैभन्दा बढी खरिद गर्ने युवा वर्ग अर्थात् १८ देखि २४ वर्ष उमेरकाहरु रहेका छन् ।
२०१७ र २०१८ का बीच कार्ड बिक्री दर कूल गरी १.६ प्रतिशतले कम रहे पनि अघिल्लो वर्ष भने यसको कारोबार ११ प्रतिशतले वृद्धि भएको बताइएको छ । यसमा पनि बेलायतले कुनै पनि अरु देशको तुलनामा सबैभन्दा धेरै कार्ड पठाउने गरेको पाइएको छ ।
तर ग्रिटिङ कार्डको लोकप्रियता सबै क्षेत्रमा उत्तिकै स्तरमा हुँदैन । जस्तै अमेरिकामा क्रिसमसलगायत मुख्य चाडकै अवसरमा घाटा बेहोर्नुपरिरहेको बताइएको छ ।
तापनि ग्रिटिङ कार्डको उद्योग सबैले अपेक्षा गरे भन्दा धेरै स्वस्थ छ ।
यसरी भ्यालेन्टाइन्स डेमा मात्र ग्रिटिङ कार्ड मार्फत ९३ करोड ३० लाख डलर बराबर आम्दानी हुने गरेको छ ।
युवाहरुले नै यो उद्योगलाई जिवित राखिरहेको बताइएको छ ।
क्रिस्मसपछि भ्यालेन्टाइन्स डेमा नै ग्रिटिङ कार्डको सबैभन्दा धेरै कारोबार हुने गरेको छ ।
त्यस्तै जन्मदिन, वार्षिकोत्सव लगायतका उत्सवहरुलाई पनि कार्ड पठाउन योग्य समयका रुपमा लिइन्छ ।
वर्षौँसम्म यो उद्योगले संघर्ष गरिरहनुपर्ने भए पनि युवाहरुले कार्ड दिने चलनलाई हराउन भने दिएका छैनन् ।
यसैकारण युवाहरुमै केन्द्रित रहेर आधुनिक कार्डका डिजाइनहरु ल्याउन थालिएको छ ।
जस्तै बटन थिच्नासाथै बोलीको सन्देश दिने, जोक्सहरु भएका र थ्रीडी इमेज देखाउने कार्डहरु अधिक लोकप्रिय साबित भइरहेका छन् ।
तिनै युवाहरु कार्ड उद्योगमा प्रवेध पनि गरिरहेका छन् । भर्खरै ग्रिटिङ कार्ड कम्पनी लन्च गरेकी बेरी लजरस भन्छिन्, “म सानो हुँदादेखि नै ग्रिटिङ कार्ड धेरै मनपराउँथे । त्यसैले मलाई कसैले कार्ड दियो भने म त्यसलाई कहिल्यै फाल्नेछैन । कार्डलाई हामीले समात्न मिल्छ जुन इमेल र टेक्स्टमा सम्भव छैन ।”
तर तुलनात्मक हिसाबले कार्डहरु महङ्गो पर्ने हुँदा युवाहरुले उच्च गुणस्तरको कार्डमा बढी खर्च गर्ने गरेका छन् ।
यसरी ग्रिटिङ कार्ड महङ्गो हुँदै गएकाबारे धेरैको गुनासो छ । द गार्जियन
1628253175.jpg)
