काठमाडौं । क्यान इन्फोटेकको काठमाडौंमा जारी मेलाको मुख्य आकर्षणमा अफरसहितका स्टल परेका छन् ।

मेलाकै अवसर पारेर विभिन्न प्रविधि कम्पनी, संघ–संस्थाहरूले सेवा लिन चाहानेका लागि विशेष छुट, अफरलगायत घोषणा गरेका  थिए । अवलोकनकर्ताहरू पनि अफर र छुट भएका स्टलमा झुम्मिएको देखिन्थे । शुक्रबारदेखि सुरु प्रविधि प्रदर्शनीमा इन्टरनेट सेवाप्रदायक, एसेसरिज, सफ्टवेयर निर्मातालगायत कम्पनीहरूले ग्राहकका लागि छुट तथा अफरहरू दिइरहेका छन् ।

मेलामा एनसेलले आप्mनो स्टलबाट १ रुपैयाँमै सिम उपलब्ध गराइरहेको छ । सिममा ग्राहककले १० मिनेको निःशुल्क टक टाइम र १० एसएमएस निःशुल्क प्राप्त गर्नेछन् । यस्तै, उक्त सिममार्फत ग्राहकले ३ दिनका लागि २ जीबी डाटा निःशुल्क पाउनेछन् । एनसेलले आफ्नो स्टलबाट रिजार्च खरिद गर्ने ग्राहकका लागि समेत विभिन्न छुट दिइरहेको छ ।

यस्तै, मेलामा इन्टरनेट सेवाप्रदायक वर्ल्डलिंक, सुबिसु, भायानेटलगायत कम्पनीहरूले अवलोकनकर्ताहरूका लागि भन्दै विभिन्न प्याकेज सार्वजनिक गरेका छन् । छुट सुविधासहितका उक्त प्याकेजमा ग्राहकले कम मूल्यमा इन्टरनेट सेवा लिन सक्ने सुविधाहरू राखेका छन् ।

छुट्टै पेभेलियनमा राखिएका मोबाइल, एसेसरिजलगायतका ब्रान्डले अवलोकनकर्ता आकर्षित गर्न सोहीअनुसारका छुट तथा अफरहरू दिइरहेका छन् । विभिन्न ब्रान्डका केही कम्पनीहरूले अवलोकनकर्ताहरूका लागि भन्दै मेलाका अवसरमा ५० प्रतिशतभन्दा बढीको छुटसमेत दिइरहेको जनाएका छन् । छुट धेरै हुने र केही ब्राण्डका पोर्टेबल एसेसरिजमा अवलोकनकर्ताको बढी भीड लाग्ने गरेको आयोजक क्यान एसोसिएसनका सचिव चिरञ्जीवी अधिकारीले बताए । 

यस्तै, मेलामा आउने अवलोकनकर्ताहरू साइबर सेक्युरिटीबारे जानकार भए नभएको अनुसन्धान गर्ने उद्देश्यले सर्भेक्षण पनि गरिएको क्यानले जनाएको छ । १ सय ७४ वटा स्टलसहितको मेला बुधबारसम्म चल्नेछ । सूचना, प्रविधि र मनोरञ्जनसम्बन्धी प्रदर्शनी तथा सम्मेलनको यो २६औं संस्करण हो ।