अन्ततः नेपाल सरकारले चीनको वुहानमा अलपत्र परेका नागरिकलाई उद्धार गर्ने कर्तव्य पूरा गरेको छ । सुरुमा सरकारले देखाएको आलटाल र ढिलासुस्तीलाई बिर्सेर उद्धार गरिएका नेपालीहरू, तिनका आफन्त र सबै नेपालीका तर्फबाट नेपाल सरकारलाई धन्यवाद दिऊँ । सत्तारुढ दलका सगोत्री केही कम्युनिस्ट नेताहरूको अमानवीय टिप्पणीहरू र सरकारी अधिकारीहरूको गैरजिम्मेवार शैलीले वुहानमा अलपत्र परेकाहरूको चित्त दुखाएको थियो भने नेपालभित्र पनि आक्रोश उत्पन्न भएको थियो । नागरिकहरूसमेतको दबाबका कारण सरकार अन्ततः नागरिकप्रतिको कर्तव्य पूरा गर्न तत्पर भयो । घर फर्कन चाहनेहरूलाई ल्याउन पठाइएको विमानबाट १ सय ७५ जनालाई आइतवार बिहान नेपाल ल्याएर अलगथलग राखिएको छ । चीनमा जहाजमा सवार नहुँदै र नेपालमा जहाजबाट ओर्लेपछि गरिएको उनीहरूको स्वास्थ्य परीक्षणमा समस्या देखिएको छैन ।

चीनमा गत डिसेम्बर, २०१९ कै अन्त्यतिर अहिले कोविद-९ नामकरण गरिएको नोवल कोरोना भाइरस फैलन सुरु भएको रहेछ । तर, सबै प्रकारको सूचनामा नियन्त्रण गर्ने चीन सरकारको संयन्त्रले कोरानाभाइरसको संक्रमणका विषयमा पनि सूचना नियन्त्रण गर्यो । कोरोना भाइरसको संक्रमण देखिएको सूचना सार्वजनिक गर्ने व्यक्तिलाई नै सरकारले नियन्त्रणमा लियो । अन्ततः डा. डाली वेनलियाङ नाम गरेका ती नेत्र विशेषज्ञको कोरोना भाइरसकै संक्रमणबाट ज्यान गयो । महामारीभन्दा सूचना नियन्त्रणलाई सरकारले प्राथमिकता दिएकै कारण अहिले कोरोनाको संक्रमण विकराल भएको अन्तर्राष्ट्रिय समुदायले ठहर गरेको छ । तर, चीन सरकारको प्रचारतन्त्र भन्दा दुई पाहिला अगाडि सरेर नेपालका केही कम्युनिस्ट नेताहरूसमेत कोरोनाभाइरसको भयावहतालाई उपेक्षा गर्नुपर्ने पैरवी गर्दैथिए । उता, संसारका लगभग सबै मुलुकले वुहानबाट आफ्ना नागरिक फर्काइसकेका थिए । यसैले वुहानमा अलपत्र परेकाहरूका अभिभावक राष्ट्रिय मानवअधिकार आयोगलगायतसँग गुहार माग्न पुगेका हुन् । आफ्ना प्रियजन सकुशल स्वदेश फर्केपछि सबैले सन्तोषको सास फेरेको हुनुपर्छ ।

नेपाल फर्काइएकाहरू भाइरस संक्रमित हुनसक्ने जोखिम भएकाले अहिले उनीहरूलाई चिकित्सकहरूको निगरानीमा अलग्गै राखिएको छ । उनीहरूको नियमित स्वास्थ्य अवस्थाको अवलोकन र निगरानी गरिने बताइएको छ । कसैमा भाइरसको शंका लागेमा उपचारको प्रबन्ध मिलाइसकिएको छ । यसैले उनीहरूलाई अलग-अलग (क्वारेन्टाइन) मा राख्दैमा संक्रमित ठान्नु हुँदैन । संक्रमण भए नै पनि कोरोनाभाइरसको उपचार हुन्छ । यसैले कसैले पनि चिन्ता गर्नुपर्ने वा आत्तिनुपर्ने अवस्था छैन । सरकारले उद्धार गरेर ल्याएपछि निगरानीमा राख्ने र आवश्यक भए उपचार गर्ने व्यवस्था मिलाएर बुद्धिमानी देखाएको छ । वुहान विमानस्थलमा रोकिएकाहरूको पनि नेपाल सरकारले हेरचाह गरिरहनुपर्छ भने नेपाल आउन नमानेकाहरूको अवस्थाको पनि जानकारी लिइरहनुपर्छ । अनिमात्र राज्यको दायित्व पूरा हुनेछ । चीनबाट फर्काइएकाहरू कसैलाई पनि कोरोनाभाइरसको संक्रमण नभएको होस् भन्ने कामना गरौँ । चीनमा अलपत्र परेका नेपालीलाई घर फर्काउने क्रममा संलग्न नेपाल वायुसेवा निगमका उडान कर्मचारी, स्वास्थ्यकर्मी तथा सहयोग गर्ने चीन सरकारलगायत सबै धन्यवादका पात्र भएका छन् । अहिले सेवामा संलग्न सबैको मानवीय भावना र कर्तव्य परायणता पनि सराहनीय छ । निगरानीमा रहेकाहरूको राम्ररी हेरचाह गर्न र कसैमा संक्रमण देखिए पनि अरूमा नफैलियोस् भनेर सावधान भने अत्यन्त जरुरी देखिन्छ । ‘क्वारेन्टाइन’को व्यवस्थापनमा सरकारी शैलीको हेलचेक्य्राइँ र आलटाल भने हुनुहुँदैन ।