वासिङ्टन । संयुक्त राज्य अमेरिका र तालिबानबीच सात दिन हिंसात्मक गतिविधि नगर्ने सम्झौता भएको अमेरिकी रक्षा मन्त्री मार्क इस्पेरले बताएका छन् । उनले तालिबानसँग १८ वर्ष लामो युद्ध अन्त्य गर्दै शान्ति सम्झौता हुने अपेक्षा गरेका छन् ।
" राजनीतिक सम्झौतामार्फत् अफगानिस्तानको समस्याको समाधान गर्न हामीले जतिसक्दो राम्रो गरेका छौं । यस किसिममा प्रगति भइरहेको छ र हामीलाई चाँडै यस विषयमा रिपोर्ट हुने अपेक्षा गरेका छौं," रक्षा मन्त्री इस्पेरले बिहीबार ब्रसेल्समा पत्रकारसँग कुरा गर्दै भने ।
उनले आंशिक युद्धबिराम कहिलेदेखि सुरु हुने भन्ने बताएनन् । तर, अमेरिकी राष्ट्रपति डोनाल्ड ट्रम्पले बिहीबार शान्ति सम्झौताको 'धेरै नजिक' पुगेको बताए । "मलाई लाग्छ, हामी धेरै नजिक छौं," ट्रम्पले भने, "मलाई लाग्छ, त्यहाँ धेरै राम्रा अवसरहरु छन् । हामीले यस किसिमको सम्झौता गर्नेछौं.... । यस विषयमा आगामी दुई सातामै थाहा हुन्छ ।"
अमेरिका र तालिबानबीचको महत्त्वपूर्ण प्रगति भएको भन्ने संकेत ट्रम्पको पछिल्लो प्रतिक्रियाले स्पष्ट पारेको छ । - अलजजिरा