Skip Advt.

याङ्ग्री लार्केको पानी ल्याउने बाटो खुल्यो

याङ्ग्री लार्केको पानी ल्याउने बाटो खुल्यो

सिन्धुपाल्चोक । मेलम्ची खानेपानी आयोजनाको दोस्रो चरणअन्तर्गत याङ्ग्री लार्के आयोजना कार्यान्वयन गर्ने सिलसिलामा पाँचपोखरी थाङपाल गाउँपालिकासँग सम्झौता सम्पन्न भएको छ । पहिलो चरणमा १७ करोड लिटर पानी ल्याउने काम करीब सम्पन्न हुने दौरानमा रहेको छ ।
     
दोस्रो चरणअन्तर्गत ३४ करोड लिटर पानी काठमाडौँ उपत्यकामा ल्याउँदा प्रभावित हुने स्थान र जनताले के–के सुविधा पाउने भन्ने विषयमा केही विवाद कायम थियो । अब त्यो विवाद अन्त्य भएपछि सहमतिपत्रमा हस्ताक्षर गर्ने काम सम्पन्न भएको छ ।

दुवै नदीबाट पानी पठाएवापत प्रभावित जनताले पाउने सुविधाका सम्बन्धमा गाउँपालिका र सरोकार समितिकातर्फबाट नौ वटा माग प्रस्तुत गरिएको र ती माग पूरा गर्न समितिले सहमति जनाएपछि यो अवस्था सिर्जना भएको छ । 

आयोजना कार्यान्वयन गर्दा स्थानीय सरकार तथा समुदायमा विश्वासको वातावरण सिर्जना हुने र आयोजना समयमै सम्पन्न हुने आधारशिला तय हुने उदेश्यले मेलम्ची खानेपानी विकास समितिका तर्फबाट समितिका कार्यकारी निर्देशक तिरेशप्रसाद खत्री र गाउँपालिका अध्यक्ष टासी लामाबीच सोही क्षेत्रका सांसद शेरबहादुर तामाङ र सामाजिक विकासविज्ञ शम्भुप्रसाद कट्टेलको रोहबरमा सो सम्झौतापत्रमा हस्ताक्षर गरिएको हो ।
 
याङ्ग्री लार्के सरोकार समिति, गाउँपालिका र समितिबीच पटक–पटक भएको छलफलपश्चात यो सम्झौता भएपछि अब दोस्रो चरणको कामले गति लिने र समयमै आयोजना सम्पन्न हुनेमा सम्बद्ध पक्ष ढुक्क देखिएको छ । - रासस
 

प्रतिकृया दिनुहोस
ad