बीबीसी । फेसबुककै ट्वीटर र इन्स्टाग्राम अकाउन्ट ह्याक भएपछि सामाजिक सञ्जालमा साधारण मानिसहरुको सुरक्षालाई लिएर पुनः नयाँ विवाद सुरु भएको छ ।
ह्याकरहरुको एउटा समूहले केही समयका लागि फेसबुकको दुवै आधिकारिक अकाउन्ट नियन्त्रणमा लिँदै ‘फेसबुक समेत ह्याक गर्न सकिने रहेछ’ भनेर लेखेको हो । सबै अकाउन्ट अहिले फेसबुकले रिस्टोर गरिसकेको छ ।
‘आओर माइन’ नामक उक्त ह्याकर समूहले साइबर संवेदनशीलताबारे सबैलाई सचेत गराउन त्यस्तो गरेको स्वीकार गरेको छ ।
त्यही समूहले गत महिना पनि अमेरिकी राष्ट्रिय फुटबल लिगका टिमको दर्जनौँ अकाउन्टहरु ह्याक गरेको थियो ।
त्यस्तै यसले फेसबुक र म्यासेन्जरको इन्स्टाग्राम अकाउन्ट पनि ह्याक गरि आफ्नो लोगो शेयर गरेको हो ।
फेसबुकको आफ्नो वेबसाइट भने ह्याक भएको थिएन । यस्तोमा सो समूहले फेसबुकको आधिकारिक ट्वीटर अकाउन्ट मार्फत, ट्वीटर भन्दा फेसबुकको सुरक्षा व्यवस्था राम्रो भएको भनि लेखेको छ ।
यता ट्वीटरले भने तेस्रो पार्टीमार्फत ह्याकिङ भएको स्वीकार गर्दै यसबारे खबर पाउनासाथ अकाउन्ट लक गराइ, सचेत गराएको बताएको हो ।
ट्वीटरले आफ्नो आधिकारिक बयानमा भनेको छ, “हामीलाई सो अवस्थाबारे थाहा हुनेबित्तिकै हामीले ह्याक भएका अकाउन्ट लक गराएका हौँ र फेसबुकका पार्टनरहरुसँग यसलाई सामाधान गर्न नजिकी सहकार्य गरिरहेका छौँ ।”
यी अकाउन्टहरुको पहुँच तेस्रो पार्टी, खोरोजमार्फत पाउन सफल भएको बताइएको छ ।
यो एक मार्केटिङ प्लेटफर्म हो जसले सामाजिक सञ्जाल व्यवस्थापनको काम गर्दछ ।
तर बीबीसी सम्पर्कमा आउँदा भने खोरोजले कुनै प्रतिक्रिया दिएन । आओरमाइन चाहिँ दुबईस्थित ह्याकिङ समूह हो जसले हाइ प्रोफाइल व्यक्तित्व र कम्पनीहरुको अकाउन्ट ह्याक गर्ने गरेको छ ।
विगतमा पनि यसले ट्वीटरकै संस्थापक ज्याक डोर्सेको अकाउन्ट ह्याक गरि चर्चामा आएको थियो भने गुगलका प्रमुख सुन्दर पिचाइ अनि नेटफ्लिक्स र इएसपीएनलाई पनि निशाना बनाइसकेको छ ।
सो समूहले सामाजिक सञ्जाल कति असुरक्षित छ भन्ने देखाउन खोजेको र पीडीतहरुलाई आफ्ना सुरक्षा सेवाहरु प्रयोग गर्न सुझाव दिने गरेको छ ।
यसरी सामाजिक सञ्जाल पछिल्लो समय व्यक्तिगत जानकारी लिक हुनेदेखि फेक न्युजलगायत थुप्रै कारणले असुरक्षित, विवादित र आलोचित बन्दै गएको छ ।