काठमाडौं । सत्तारूढ नेपाल कम्युनिस्ट पार्टी (नेकपा) का सांसद झपटबहादुर रावलले कैलाली र कञ्चनपुर जोड्ने पूर्वपश्चिम राजमार्ग आठ लेनको बनाउन माग गरेका छन् । 

प्रतिनिधिसभाको शुक्रबार जारी बैठकको शून्य समयमा रावलले कैलालीको चिसापानी र कञ्चनपुरको गड्डाचौकी खण्ड आठ लेनको बनाउन सरकारसँग माग गरेका हुन् । 

उक्त सडक अत्यन्तै साँघुरो भएको र दिनानुदिन दुर्घटना हुँदा नागरिकले अनाहकमा ज्यान गुमाउनुपरेको भन्दै उनले सडक स्तरोन्नतिको माग गरे । 

“कैलालीको चिसापानी र कञ्चनपुरको गड्डाचौकी जोड्ने एक सय २८ किमि खण्ड अत्यन्तै साँघुरो भएका कारण दिनप्रतिदिन दुर्घटना बढ्दै गएका छन्, दुर्घटनामा दिनदिनै नागरिक अंगभंग हुने, मृत्यु हुने दर बढेको छ,” सांसद रावलले भने, “उक्त सडकखण्डको स्तरोन्नतिका लागि कमितमा पनि आठ लेनको बाटो निर्माणको काम यथाशीघ्र सुरु गर्न आग्रह गर्दछु ।”