काठमाडौं । अर्थमन्त्री डा. युवराज खतिवडाले कुल गार्हस्थ उत्पादन (जीडीपी) लाई सघाउ पुग्ने गरी कर्जाको गुणस्तरमा ध्यान दिन बैंक तथा वित्तीय संस्थाहरूलाई आग्रह गरेका छन् ।

राष्ट्रिय वाणिज्य बैंकको ५५ औं वार्षिकोत्सव कार्यक्रमलाई शुक्रबार सम्बोधन गर्दै अर्थमन्त्री खतिवडाले कर्जा र जीडीपीको अनुपात ८० प्रतिशत नाघ्न थालेको भन्दै बैंकहरूलाई सचेत गराएका थिए । उनले नेपालको कुल गार्हस्थ उत्पादन र कर्जाको अनुपातको अवस्थालाई लिएर अन्तर्राष्ट्रिय मुद्रा कोषले समेत चासो देखाइसकेको अवस्थामा बैंकहरूले कर्जाको आयतन बढाउनेभन्दा पनि उत्पादन मुलक क्षेत्रमा कर्जा बढाउन ध्यान दिन आग्रह गरे ।

उनले अहिलेको अवस्थामा कुल गार्हस्थ उत्पादनको गणना विधि परिमार्जन गर्नुपर्ने अवस्था समेत आएको बताए । तर पनि बैंकहरूले कर्जा बढाउँदै गए राष्ट्र बैंकले क्रेडिट सिलिङ लगाउनुपर्ने अवस्था आउने उनको धारणा थियो ।

अर्थमन्त्री खतिवडाले राष्ट्रिय वाणिज्य बैंकलाई ब्याजदरमा ध्यान दिन पनि आग्रह गरे । उनले निक्षेपमा कम ब्याजदर दिएकाले बचतकर्ता निराश हुनसक्ने र बचत बाहिरिन सक्ने भएकाले ध्यान दिन आग्रह गरे । उनले दीर्घकालीन रूपमा ठुला लगानीमा प्रवाह हुने कर्जामा स्थिर ब्याजदर कायम गर्ने विषयमा राष्ट्रिय वाणिज्य बैंकले नेतृत्व लिन सक्ने समेत बताए ।

कार्यक्रममा राष्ट्रिय वाणिज्य बैंकका प्रमुख कार्यकारी अधिकृत किरणकुमार श्रेष्ठले बैंकले साना तथा मझौला कर्जा र सहुलियत ब्याजदरको कर्जाको कार्यान्वयनमा जोड दिएको बताए । उनले गत वर्ष ५ अर्ब ४ करोड रुपैयाँ नाफा गरेको र यस वर्ष लामो समयपछि १२ प्रतिशत लाभांश दिन सफल भएको बताए ।

प्रमुख कार्यकारी अधिकृत श्रेष्ठले चालु वर्षको दोस्रो त्रैमास सम्ममा बैंकले १ खर्ब ९७ अर्ब कुल निक्षेप संकलन गरी १ खर्ब ५२ अर्ब कर्जा लगानी गरेको तथा २ अर्ब ५ करोड रुपैयाँ खुद मुनाफा कमाएको जानकारी दिए । उनले बैंकको कुल सम्पत्ति २ खर्ब ५० अर्ब पुगेको तथा कर्जा पुँजी निक्षेप अनुपात ७७ प्रतिशत रहेको समेत जानकारी दिए ।