काठमाडौं । इन्जुरी समयमा कप्तान सन्तोष साहुखलले गोल गरेपछि च्यासल युथ क्लबले जारी सहिद स्मारक ‘ए’ डिभिजन लिग फुटबलमा दोस्रो जित निकालेको छ ।
आठौं चरणको खेलमा ब्रिगेड ब्वाइज क्लब (बीबीसी) माथि १–० को नतिजा निकाल्दै च्यासलले दोस्रो जित दर्ता गरेको हो । च्यासलको जितमा कप्तान साहुखलले अन्तिम समयमा निर्णायक गोल गरे ।
त्रिपुरेश्वरस्थित दशरथ रंगशालामा निर्धारित समयसम्म गोलरहित बराबरी भएको खेलमा च्यासल इन्जुरी समयमा गोल गर्न सफल भयो । च्यासलका लागि कप्तान सन्तोषले इन्जुरी समयको दोस्रो मिनेटमा गोल गरेका हुन् । उनको गोलसँगै च्यासल विजय भएको हो ।
त्यसअघि ८६औं मिनेटमा च्यासल प्राप्त कर्नरलाई सदुपयोग गर्न नसक्दा अग्रता लिनबाट वञ्चित रहेको थियो । ७४औं मिनेटमा च्यासलका अमिर श्रेष्ठ सुन्दर अवसरलाई खेर फालेका थिए । ६५औं मिनेटमा च्यासलका सुनील खड्काको प्रहार बाहिरिएको थियो ।
३४औं मिनेटमा बीबीसीका कप्तान अनिल गुरुङको प्रहार बाहिरिँदा बीबीसी अग्रता लिनबाट वञ्चित भएको थियो । जितसँगै ३ अंक जोडेको च्यासलको जारी लिगमा ९ अंक भएको छ । च्यासलले यसअघिका ७ मध्ये १ मा जित ३ मा बराबरी र ३ मा हार ब्यहोरेको थियो । पराजित बीबीसीको ८ अंक छ ।