पशुपतिनगर । सूर्योदय नगरपालिकाको केन्द्र फिक्कलमा तीन करोड रुपैयाँ बढीको लागतमा सार्वजनिक व्यायामशालासहितको उद्यान निर्माण गरिने भएको छ । सङ्घीय र स्थानीय सरकारको लागत साझेदारीमा उद्यान निर्माण हुन लागिएको हो ।
उद्यान निर्माण गरी सञ्चालन गर्ने विषयमा फक्कलस्थित लोपोन्मुख लाप्चा समुदायको पुरातात्विक गुम्बा (फेन्सोङ) को संरक्षण र प्रवर्द्धन गर्न नगरपालिकाबीच छलफल भइ सम्झौता पनि भएको छ । उद्यान निर्माणसँगै गुम्बाको मर्मत तथा सम्भार गर्न पुरातात्विक विभागको सल्लाह सुझावअनुसार गरिने नगरप्रमुख रणबहादुर राईले बताए ।
गुम्बाबाहेक झन्डै १२ रोपनीमा सार्वजनिक व्यायामशालासहितको उद्यान बन्नेछ । सो उद्यानको सञ्चालनको जिम्मा फेन्सोङलाई दिइनेछ । संरचनाको कार्य दुई चरणमा हुनेछ । यही माघमा पहिलो चरणको बोलपत्र आह्वान हुनेछ । सूर्योदय नगरपालिकाको तर्फबाट कायममुकायम प्रमुख प्रशासकीय अधिकृत रूद्रनारायण सापकोटा र फेन्सोङ गुम्बाको तर्फबाट अध्यक्ष प्रेमबहादुर लाप्चाले सम्झौतामा हस्ताक्षर गरेका छन् ।
नगरप्रमुख रणबहादुर राई, उपप्रमुख दुर्गादेवी भट्टराई, वडा १० का अध्यक्ष पेमाउगेन लामा, कार्यपालिका सदस्य वीरबहादुर लाप्चा, प्रशासकीय अधिकृत सविना चौलागाईं, मानवीर लाप्चालगायतको उपस्थिति थियो । सूर्योदय नगरपालिकाले लोपोन्मुख लाप्चा जातिको आस्थाको धरोहर फेन्सोङ गुम्बा क्षेत्रलाई संरक्षण, प्रवर्द्धन गर्ने हेतुले डीपीआर तयार गरी केही दिनमै निर्माण अगाडि बढाइने वडाध्यक्ष पेमा उगेन लामाको भनाइ छ । -रासस