काठमाडौं । काठमाडौंको टेकु मचलीस्थित सहिद शुक्रराज शास्त्रीलाई मृत्युदण्ड दिइएको स्थानमा श्रद्धाञ्जली सभा गरिएको छ । सहिद सप्ताहको पहिलो दिन आज श्रद्धाञ्जली सभामा भेला भएकाले उनको कामको सम्झना गरे ।

सभामा महानगरका प्रमुख विद्यासुन्दर शाक्यले पारिवारिक रूपमा प्रयोग हुँदै आएको शासकीय शक्ति जनताका हातमा पुर्‍याउन बलिदानी दिने सहिदको योगदानका कारण नेपालमा गणतन्त्र सम्भव भएको बताए । “दलको कुरा गर्नै नपाइने अवस्थामा ज्यानको ख्याल नगरी प्रजातन्त्रका पक्षमा ज्यान आहुति दिने सहिदहरूको योगदान मेरा लागि सिकाइ हो,” उनले भने ।

सभामा वडा १२ का अध्यक्ष एवं वातावरण व्यवस्थापन समिति संयोजक विकास डंगोलले प्रजातन्त्रका लागि सहादत प्राप्त गर्ने सहिदका कारण जनताका छोराले अवसर पाएकैले उनीहरूको योगदान कहिल्यै बिर्सन नहुने बताए ।

राणा शासनविरुद्ध देश–विदेशमा भएका भूमिकामा नाइके भएको आरोप लगाएर शास्त्रीलाई १९९७ साल माघ १० गते टेकु मचलीस्थित खरिबोटमा र धर्मभक्त माथेमालाई सिफल उकालोमा रहेको बकाइनाको रूखमा झुन्ड्याएर मृत्युदण्ड दिइएको थियो । त्यस्तै गंगालाल श्रेष्ठ र दशरथ चन्दलाई शोभा भगवतीमा गोली हानिएको थियो ।

प्रजातन्त्र प्राप्तिका लागि मृत्युदण्ड पाएका ४ सहिदको पूर्ण कदको सालिक स्थापना गर्ने क्रममा यस वर्ष महानगरले धर्मभक्त माथेमा, गंगालाल श्रेष्ठ र दशरथ चन्दको सालिक प्रतिस्थापन गर्दै छ । गएको वर्ष माघ १० गते टेकु मचलीस्थित खरिबोटमुनि आयोजना गरिएको श्रद्धाञ्जली सभामा शुक्रराज शास्त्रीको सालिक अनावरण गरिएको थियो ।

महानगरको वडा १२ ले १० लाखमा पित्तलको साढे ५ फिट अग्लो पूर्ण कदको सालिकलाई यात्रुले पनि देख्ने गरी पूर्वमोहोडा बनाएर राखिएको छ । शास्त्रीलाई खरिबोटको उत्तर मोहडामा झन्ड्याइएको थियो । सालिक महेश तुलाधरले ४ महिनामा तयार पारेका थिए । शास्त्रीको श्रद्धाञ्जली सभा भएको यो स्थानलाई  २०३५ सालमा तत्कालीन काठमाडौ नगर पञ्चायतले शिलालेख राखी संरक्षण सुरु गरेको हो । 

सहिद सप्ताहका बाँकी कार्यक्रममा माघ १३ गते सिफलमा सहिद धर्मभक्तले अमरत्व प्राप्त गरेको स्थानमा र माघ १५ गते शोभा भगवतीमा गंगालाल श्रेष्ठ र दशरथ चन्दले अमरत्व प्राप्त गरेको स्थानमा श्रद्धाञ्जली सभा हुँदै छ । त्यस्तै माघ १६ गते सहिद स्मारक लैनचौरमा सहिदप्रति श्रद्धाञ्जली सभा हुनेछ ।