काठमाडौं । नेत्रविक्रम चन्द ‘विप्लव’ नेतृत्वको प्रतिबन्धित समूह नेकपाले नेतादेखि व्यापारीसम्मलाई आक्रमण गर्नसक्ने भन्दै प्रहरीले सुरक्षा सतर्कता बढाएको छ ।
राजधानीमा सुरक्षा खतरा हुनसक्ने सम्भावित व्यक्तिहरुको सूची नै तयार पारेर प्रहरीले सुरक्षा सतर्कता बढाएको उच्च स्रोतले जानकारी दिएको छ ।
एक साताअघि मात्रै सो समूहले राजधानीका दुई स्थानमा बम राखेको थियो ।
शोभाकान्त ढकालको घरमा बम विस्फोट भएको थियो भने वालुवाटारमा राखिएको बम डिस्पोज गरिएको थियो ।
‘मास सेन्टिमेन्ट’ आफ्नो पक्षमा पार्नका लागि चर्चामा रहेका केही व्यक्तिलाई सो समूहले कारवाहीको निसानामा राखेको हुँदा सुरक्षा सतर्कता बढाइएको प्रहरी स्रोतले जानकारी दिएको छ ।
विप्लव समूहका एक नेताका अनुसार भ्रष्टाचारको आरोप लागेकाहरु मुख्य निसानामा छन् ।
उनले भने, ‘‘स्थानीय तहका जनप्रतिनिधिदेखि केही सरकारी कर्मचारी, सत्तारुढ नेकपाकै केही शीर्ष नेता र हाम्रै पार्टी छाडेर गएकाहरु हाम्रो लिष्टमा छन् ।”
विप्लव समूहले भौतिक कारवाहीको नीति लिए पनि ज्यान लिनेसम्मको योजना भने नबनाएको समूहका नेताहरु बताउँछन् ।
प्रहरी प्रवक्ता डीआईजी शैलेश थापा क्षेत्री विप्लव समूहका हरेक गतिविधिलाई सुक्ष्म रुपमा निगरानी र प्रभावकारी प्रहरी परिचालन गरेको बताउँछन् ।
समाजमा त्रास सिर्जना गरेर चन्दा आतंक मच्चाउन विप्लव समूहले गतिविधि गरिरहेको उनको आरोप छ ।
गत फागुनमा प्रतिबन्ध लागेपछि १३५७ विप्लव समूहका नेता–कार्यकर्ता पक्राउ परेको डीआईजी क्षेत्रीले बताए ।
प्रहरी प्रधान कार्यालयले राजधानीलाई विप्लव समूहले निसाना बनाएको निष्कर्ष निकाल्दै मातहतका निकायलाई त्यसबारे जानकारी गराएको थियो ।
राजधानीमा उपत्यका बाहिरका अपरिचित अनुहारका व्यक्तिबाट उनीहरुले आफ्ना गतिविधि गरिरहेको प्रहरी निष्कर्ष छ ।
प्रहरी प्रधान कार्यालयभित्रै रहेको विशेष व्यूरोले विप्लव समूहका गतिविधिबारे देशभर टोली परिचालन गरेको छ ।
काठमाडौं, ललितपुर, भक्तपुर परिसर र महानगरीय अपराध महाशाखाले पनि समूहका गतिविधिलाई निगरानी गर्न सादा पोशाकका प्रहरी परिचालनमा वृद्धि गरेको छ ।
विप्लव समूहकै गतिविधि निगरानी गर्न छुट्टै टोली गठन गरेको एक अधिकारीले पुष्टि गरे ।
परिसर काठमाडौंका एसपी अशोक सिंहले सुरक्षा थ्रेट भएका व्यक्तिसँगै उनीहरु रहने क्षेत्रमा सुरक्षा सतर्कता बढाइएको बताए ।
बढाइएको उनले बताए । राजधानीमा को–कोलाई सुरक्षा थ्रेट हो त ? भन्ने बाह्खरीको जिज्ञासामा एसपी सिहंले भने,‘‘उनीहरुले कहाँ–कहाँ वम राख्दै आएका छन् । विस्फोट गराएका छन । त्यही आधारमा पनि हामीले अनुमान गर्न सक्छौं ।’’ प्रहरी स्रोतका अनुसार ललिता निवासको जग्गा प्रकरणमा जोडिएका व्याक्तिको सुरक्षामा समेत ध्यान दिइएको छ ।