काठमाडौं । उत्तर कोरियाले बुधबार बिहान छाडेको ब्यालेस्टिक मिसाइल जापानको नियन्त्रणमा रहेको समुद्रमा खसेको छ । संयुक्त राष्ट्र सुरक्षा परिषद्ले प्रतिबन्ध लगाए पनि यसरी मिसाइल हान्ने मुलुक उत्तर कोरियामात्रै हो । 

जापानका एक जना सुरक्षा अधिकारीलाई उद्धृत गर्दै रोयटरले यसले क्षेत्रीय तनाव बढाएको समाचार दिएको छ । जापानका प्रधानमन्त्री सिन्जो आबेले यसलाई जापानको सुरक्षामा गम्भीर खतरा भन्दै कडा विरोध गरेका छन् । 

यो मिसाइल मध्यम दूरीको अर्थात् हजार किलोमिटरसम्म प्रहार गर्न मिल्ने प्रकारको भएको दक्षिण कोरियाली अधिकृतले बताएको पनि रोयटरले उल्लेख गरेको छ ।

गत जुलाई १९ मा पनि उत्तर कोरियाले मध्यम दूरीका ३ वटा मिसाइल प्रक्षेपण गरेको थियो । 

लामो दूरीको मिसाइल र आणविक परीक्षण गरेपछि यही वर्षको जनबरी महिनादेखि उत्तर कोरियामाथि प्रतिबन्ध लगाइएको छ ।  

यसैबीच अमेरिकाले मिसाइल प्रक्षेपणको कडा निन्दा गरेको पनि रोयटरले जनाएको छ ।