आजदेखि सन् २०२० सुरु भयो । नेपालले २०२० लाई २० लाख पर्यटक भित्र्याउने गरी भ्रमण वर्षको रूपमा मनाउने तयारी गरेको छ । नेपाल आउँदा भौगोलिक सीमा जोडिएका उत्तर र दक्षिणका मुलुकबाट समेत पर्यटकहरू हवाई मार्गबाट आउँछन् । यसैले भ्रमण वर्षको सफलताका लागि हवाई यात्रा सुरक्षित, सहज र सुविधाजनक हुनु अनिवार्य हुन्छ । विदेशी विमान सेवाहरू मूलतः नाफामात्रका लागि नेपाल आउने हुन् । नेपालको भ्रमण वर्ष सफल बनाउनैका लागि तिनले विशेष योगदान गर्ने अपेक्षा गर्न मिल्दैन । यसैले भ्रमण वर्ष, २०२० सफल बनाउन नेपाल वायुसेवा निगमको भूमिका महत्त्वपूर्ण हुने देखिन्छ । विडम्बना, यति महत्त्वपूर्ण भएर पनि राष्ट्रिय ध्वजावाहकको अवस्था भने अत्यन्त दयनीय छ । 

उद्घाटनको तामझामले मात्र लक्ष्य पूरा हुने भए सायद भ्रमण वर्षको सफलताका बारेमा पनि चिन्ता गर्नुपर्ने थिएन । सरकारी आदेश र घोषणाबाट काम हुने भए पनि सबै सहज र सरलरूपमा सम्पन्न हुन्थ्यो । निजी क्षेत्रको सहयोग र उत्साहमात्र पर्याप्त हुने भए पनि शंका गर्नुपर्ने थिए । विगतमा जस्तै निजी क्षेत्र यसपटक पनि निकै उत्साहित देखिएको छ । हवाई यात्रुहरूलाई सुरक्षा, सुविधा र सहुलियत दिन हवाई उडानसँग सम्बन्धित सरकारी निकायहरू बढी जिम्मेवार र जाँगरिलो हुनुपर्छ । नेपाल नागरिक उड्डयन प्राधिकरणका कर्मचारी नेताको अराजक अभिव्यक्तिलाई ‘स्थाली पुलाक न्याय’अनुसार हेर्ने हो भने यो नियामक निकायबाट पनि भ्रमण वर्ष सफल बनाउन अपेक्षित भूमिका पूरा हुने देखिँदैन । 

संस्कृति, पर्यटन तथा नागरिक उड्डयन मन्त्रीका शब्दमा ‘‘ह्पाप्पी बर्थ डे भन्ने दिन तँलाई कात्रो ल्याउँछौँ’’ भन्ने कर्मचारी तन्त्रबाट जिम्मेवारी पूरा हुने हैन संस्था र राष्ट्रकै कुभलो हुनेमात्र अनुमान गर्न सकिन्छ । नेपाल वायुसेवा निगमको दुर्दशाका लागि सरकारी हस्तक्षेप जति दोषी छ व्यवस्थापनको दुस्साहस र भ्रष्टाचार उत्तिकै दोषी छ । सँगै निगमका कर्मचारीको गैरजिम्मेवार, अल्छी र भ्रष्ट प्रवृत्ति पनि दोषी छ । कर्मचारी नेताले मन्त्रीलाई सार्वजनिक समारोहमा धम्की दिनुको साटो आफ्नो काम राम्ररी गरेको भए अहिले प्राधिकरण टुक्य्राउने चर्चा नै हुँदैन थियो होला । कहाँबाट आयो सुविधा कटाउनेको ‘हात काट्ने’ धम्की दिने आँट ? पक्कै पनि प्राधिकरण व्यवस्थापनकै कमजोरीले कर्मचारी यति उद्दण्ड भएको हुनुपर्छ । यसैले अराजकता हुर्काउने चाटुकारहरूलाई बेलैमा पर्गेल्न सकेमात्र लक्ष्य हासिल हुनसक्छ ।
 
निगम र प्राधिकरणको व्यवस्थापनमा कमजोरी नभएको भए यस्तो दुर्दशा हुने थिएन । यसैले, भ्रमण वर्ष सफल बनाउने हो भने निगम र प्राधिकरणको व्यवस्थापनमा सुधार गरेर तिनलाई जिम्मेवार पनि बनाउन तत्काल आवश्यक उपाय अपनाउनुपर्ने देखिन्छ । मन्त्रीले कर्मचारीसँग जुहारी खेल्नुको साटो अराजकता अन्त्य गर्न र संस्थालाई सही गति र दिशा दिन सक्रियता देखाउनुपर्छ । निगमले भ्रमण वर्षभर नियमित, अपेक्षाकृत सस्तो र सहज सेवा दिने अनि प्राधिकरणले विमानस्थललाई सफा, सुरक्षित र आकर्षक बनाइराख्ने तथा यात्रुलाई अप्ठेरो हुन नदिने हो भने त्यसले पक्कै सकारात्मक प्रभाव पार्नेछ । यस्तो प्रभाव दिगो पनि हुनेछ । त्यसले नेपालको पर्यटनलाई स्वःस्फूर्त गति र दिशा दिनेछ । यसैले भ्रमण वर्ष, २०२० सफल बनाउन प्रतिबद्ध देखिएका सरकार विशेषगरी तालुकवाला मन्त्रीले निगम र प्राधिकरणको सुधारमा ध्यान दिने अपेक्षा अर्घेल्याइँ नठहरियोस् ।