काठमाडौं । सिरियाको गृहयुद्धबाट जोगिन भाग्ने क्रममा गत वर्ष युर्सा मर्दिनीले पौडी खेलेर मेडिटेरेनियन समुद्र पार गरेकी थिइन् । लेबनान, टर्की र ग्रिस हुँदै युरोप छिर्न खोज्दा उनीहरूले प्रयोग गरेको सानो डुंगा टर्की र ग्रिसको बीचमा बिग्रेपछि युर्सा र उनकी दिदीले पौडी खेलेर डुंगा पार लगाउन सघाएका थिए । 

शरणार्थीहरू पनि खेलमा प्रतिस्पर्धा गर्नबाट वञ्चित नहोउन् भन्ने उद्देश्यले ओलम्पिकले थालेको अभियानअन्तर्गत युर्सा रियो ओलम्पिकमा पौडीमा भाग लिने तयारी गर्दैछिन् । दी न्यु योर्क टाइम्सले बुधबार दिएको समाचारअनुसार जर्मनीको एउटा केन्द्रमा पौडीको अभ्यास गरिरहेकी छिन् ।

वर्ष दिन पहिले समुद्रमा पौडी खेलेर ज्यान जोगाएका बेला उनले जीवनमा यस्तो अवसर आउने सोचेकी पनि थिइनन् होला ! बाँच्नुमात्रै पर्छ के के देखिन्छ, भोगिन्छ अनुमान गर्न पनि सकिँदैन !