काठमाडौं । अमेरिकी राष्ट्रपति निर्वाचनमा रिपब्लिकन पार्टीका उमेदवार डोनाल्ड ट्रम्पको चुनाव अभियानको समाचार दिन खटिएका दी वासिङटन पोस्टका पत्रकारको परिचयपत्र ट्रम्पको निर्वाचन सहयोगीले फिर्ता लिएका छन् ।

पोस्टको वेबसाइटमा राखिएको भिडियोमा परिचय पत्र खोसेकोमा ट्रम्पले समर्थन गरेको देखाइएको छ । ट्रम्पले पोस्टलाई 'बेइमान' भन्दै गलत समाचार प्रवाह गरेकाले परिचयपत्र खोस्नु सही भएको बताएका छन् । बेइमानलाई किन ससम्मान बस्न दिने भन्ने प्रश्न गर्दै ट्रम्पले पोस्टका पत्रकार भिडमा कतै बसेका होलान् भन्दै खिस्याएका देखिएका छन् ।

यसैगरी उनले रिपब्लिकन पार्टीका दिग्गज नेताहरू पाउल रयान र जोन म्याकेनलाई उनीहरूको निर्वाचनमा आफूले समर्थन नगर्ने धम्की पनि दिएका छन् । यी दुवै नेताले उनलाई अनुमोदन गरेका थिए तर ट्रम्पले खान दम्पतीप्रति गरेको टिप्पणीको आलोचना गरेका थिए । राष्ट्रपति पदको उमेदवारले यसरी दिग्गज नेताहरूलाई समर्थन नगर्ने धम्की दिनुलाई अमेरिकी राजनीतिमा छिचरो व्यवहार मानिने दी वासिङटन पोस्टले बुधबार जनाएको छ ।