काठमाडौं । नागरिकता नपाउँदा पीडित बनेकाहरुले तत्काल आफूहरुले नागरिकता पाउने गरी नागरिकता विधेयक अघि बढाउनुपर्ने माग गरेका छन् । महिला कानुन र विकास मञ्चले आइतबार आयोजना गरेको कार्यक्रममा सरोकारवालाहरुले नागरिकता नहुादाका पीडा सुनाउँदै यस्तो माग गरेका हुन् ।
मञ्चले आधा दर्जन सांसदहरुसँग नागरिकताबाट बञ्चित व्यक्तिहरू र सांसद प्रत्यक्ष छलफल कार्यक्रम आयोजना गरेको हो । जसमा सांसदहरु विन्दा पाण्डे, शेख चाँदतारा, नवराज सिलवाल, कृष्णभक्त पोखरेल निरू जैरीलगायत सहभागी थिए ।
कार्यक्रममा मकवानुपरकी रीता लामा (नाम परिवर्तन) ले नागरिकता नहुँदा आफुले भोग्नुपरेको पीडा सुनाइन् । ११ वर्षमा आफु बेचविखनमा परेको बताउँदै श्रीमान् भारतीय नागरिकको समेत पत्तो नभएको भन्दै आफना छोराछोरीलाई समस्या परेको बताइन् ।
२० वर्षपछि नेपाल फर्केकी उनले छोरीको लागि आमाको नामबाट नागरिकता दिन पाउँ भन्दै सर्वोच्चमा रिट हालेपनि ८ वर्षसम्म फैसला नभएको भन्दै गुनासो गरिन् । ललितपुरका अर्का राम परियार (नाम परिवर्तन) ले पनि नागरिकता नहुँदा आफुमाथी सांघातिक हमला भएको भन्दै न्यायका लागि गुहार मागे । बाल्यकालमै बुबा बितेको र त्यसपछि आमाले मामाघरमा हुर्काएका बताउने उनले सर्जमिन गराउँदा पनि जिल्ला प्रशासनले नागरिकता नदिएको गुनासो गरे ।
अन्य सरोकारवालाले नागरिकता नहुँदा बालबालिकालाई पढाउन नसकिएको, सरकारी सेवामा जान नसकिएको, पासपोर्ट बनाउन नपाएको भन्दै आफूहरुलाई राज्यविहीन नबनाउन सांसदहरुको ध्यानाकर्षण गराएका थिए । आमाको नामबाट नागरिकता पाउने संवैधानिक व्यवस्था कार्यान्वयन नभएकोतर्फ पनि उनीहरुले गुनासो गरे ।
सरोकारवालाको कुरा सुनेपछि सांसद पाण्डेले एउटा व्यक्ति जन्मिएपछि राष्ट्रविहिन हुन नहुने बताइन् । छोरीको नेपाली युवकसँष्ग विवाहपछि सजिलै नागरिकता बनेपछि छोराको हकमा बढी समस्या हुने गरेको बताउँदै उनले नागरिकता विधेयकले समस्याको समाधान गर्ने बताइन् । सांसदहरु नवराज सिलवाल, पोख्रेलले राज्य व्यवस्था समितिमा विधेयकमाथि छलफल भइरहेको बताए ।
हिउँदे अधिवेशनमा नागरिकता विधेयक पारित हुने र नागरिकतासमस्या हल हुने सांसदहरुको प्रतिवद्धता थियो ।