काठमाडौं । नेपाली राष्ट्रिय महिला फुटबल टोली फाइनलसरह मानिएको खेलमा भारतविरुद्ध पराजित भएको छ ।  १३ औं साग अन्तर्गत लिग चरणको अन्तिम खेलमा नेपाल आज भारतसँग १–० ले पराजित भएको हो । बालादेवीको निर्णायक गोलमा विजय हासिल गरेको भारतले अब उपाधिका लागि आयोजक नेपालसँग नै खेल्नेछ । फाइनल खेल सोमबार दिउँसो हुनेछ । 

पोखरा रंगशालामा सुरुआती राम्रो प्रदर्शन गरेको नेपाल १८ औं मिनेटमा गोलको शिकार भएको थियो । भारतका लागि बालादेवीले नेपाली डिफेन्डर छक्याउँदै गोल गरेकी थिइन् ।  गोलपछि दबाबमा परेको नेपालले पुनरागमनको प्रयास गरे पनि सफलता पाउन सकेन । दोस्रो हाफमा आक्रामक बनेको नेपालले गोलको अवसर सदुपयोग गर्न नसक्दा हार बेहोरेको छ ।

हारसँगै फाइनल पुगेको नेपालले अब उपाधिका लागि भारतकै सामना गर्नुपर्नेछ । भारतविरुद्ध नेपाल पछिल्लो समय लगातार पराजित छ । यसअघि विराटनगरमा गत फागुनमा सम्पन्न पाँचौं महिला साफ च्याम्पियनसिपमा पनि नेपाल पराजित भएको थियो ।