काठमाडौं । १३ औं दक्षिण एसियाली खेलकुद साग अन्तर्गत सुटिङ १० मिटर एयर पेस्तोलको महिलामा भारतले स्वर्ण जितेको छ ।
सातदोबाटोस्थित सुटिङ रेञ्जमा शुक्रबार भएको प्रतिस्पर्धामा भारतले टिम र व्यक्तिगत स्पर्धामा गरी दुई स्वर्ण पदक जितेको हो ।
भारतकी सरी परमानन्दमले २३८.४ अंकका साथ स्वर्ण पदक जितिन् । बंगलादेशकी एड्रिना फिरदोसले २३४.६ अंकका साथ रजत पदक पाउँदा पाकिस्तानकी अन्ना इबित्समले २१४.९ अंकका साथ कास्य पदक जितिन् ।
यस इभेन्टमा नेपालका तीन जना खेलाडीले छनोट चरण नै पार गर्न सकेनन् । १६ खेलाडीले प्रतिस्पर्धा गरेकामा सेरिया केसी, सरिता बस्नेत र कृष्णा थापा क्रमश १४, १५ र १६ औं स्थानमा रहे ।
टिम इभेन्ट्सतर्फ भारतले नै स्वर्ण पदक जितेको छ । भारतका सरी परमानन्द, अनुराज सिंह र इसा सिंहले १७३३ अंकका साथ स्वर्ण पदक जिते ।
पाकिस्तानका मेविस फरहान, अन्ना इवित्सम र कृसमला तलतले १६७८ अंकका साथ रजत पदक जिते ।
बंगलादेशका एन्जिला अमज्द अन्तु, एड्रिना फिद्रोस र निलुफा एस्मिनको टोलीले १६५५ अंकका साथ कास्य पदक जिते ।
नेपाली टिम प्रतियोगितामा पाँचौं स्थानमा रह्यो । नेपालकी सेरिया केसी, कृष्णा थापा र सरिता बस्नेतको जोडी १५८३ अंकका साथ पाँचौं स्थानमा रह्यो ।