काठमाडौं । जाडो महिनामा मौसमको आद्र्रता कम हुने हुँदा छाला सुख्खा हुँदै जाने चिकित्सकहरुले बताएका छन् । छाला रोग विशेषज्ञका अनुसार हातखुट्टा फुट्ने, ओठ फुट्ने, छाला सुख्खा हुने कपाल सुक्खा भएर फुरुङ्ग देखिने हुन्छ ।
छाला रोग विशेषज्ञ डा. सविना भट्टराईले जाडो महिनामा शरीरमा विभिन्न किसिमका एलर्जीहरु पनि देखा पर्ने बताइन् । “जाडोमा हातखुट्टा सुनिने समस्यापनि धेरै देखिन्छ, घाममा बस्ने आगो ताप्ने हिटर ताप्ने गर्छौ । जसले गर्दा छालामा भएको चिल्लोलाई सोसेर छालालाई सुख्खा बनाउँछ,” उनले भनिन् “उलनको कपडाले एलर्जी भएर शरीर चिलाउने र पोल्ने हुन्छ ।”
उनले जाडोयाममा हिटर ताप्ने, घाममा बस्ने गर्दा शरीरमा पानीको मात्रा पनि कम हुने हुँदा प्रशस्त मात्रामा मनतातो पानी पिउनु पर्दछ । किनभने हातखुट्टा धेरै फुट्नुको कारण पनि शरीरमा पानीको मात्रा कम हुनु रहेको बताइन् ।
जाडोमा घाममा बस्दा वा घरबाहिर निस्कँदा ‘सन्सक्रिम’मा बढी एसपीएफ भएको प्रयोग गर्नु पर्ने उनको सुझाव छ ।
त्यसैगरी जाडो मौसममा करिब ७० देखि ८० प्रतिशत मानिसलाई छाला सुख्खा हुने समस्याले सताउने गरेको छाला रोग विशेषज्ञ डा. धवेन्द्र कर्णले बताए ।
“शरीरको तुलनामा बाहिरी वातावरणको तापक्रम कम हुन थालेपछि हाम्रो शरीरबाट तापसँगै हामीले नदेख्ने गरी पानीको कण पनि बाहिर निस्किरहेको हुन्छ । जसले गर्दा छाला सुख्खा हुने समस्या देखापर्छ, अर्को जाडोको एलर्जी हुने व्यक्तिको पनि छाला सुख्खा हुन्छ,” उनले भने “दमको समस्या हुनेहरूको शरीरको सम्पूर्ण छाला सुख्खा हुन्छ । मधुमेह, उच्च रक्तचाप, थाइरोइडको समस्या साथै शरीरमा विभिन्न किसिमका भिटामिनको कमी भएकाहरूको छाला पनि सुख्खा हुन्छ ।”
छाला रोग विशेषज्ञहरुले जाडो मौसममा छाला सुन्दर राख्न र विभिन्न रोगबाट बच्न ओलिभ (जैतुन)को तेल, ओखर, एभोकाडोजस्ता चिजको नियमित प्रयोग गर्नु सुझाव दिएका छन् ।