सरकार अलोकप्रिय हुँदा धरान र भक्तपुर गुम्यो : खनाल

सरकार अलोकप्रिय हुँदा धरान र भक्तपुर गुम्यो : खनाल

काठमाडौं । सत्तारूढ नेपाल कम्युनिस्ट पार्टी (नेकपा)का वरिष्ठ नेता झलनाथ खनालले धरान र भक्तपुरको चुनाव पार्टीको पक्षमा नआउनु सरकार अलोकप्रिय भएको सन्देश भएको बताएका छन् ।

नेकपाको प्रभाव क्षेत्र मानिएको उत्तरपूर्वी भक्तपुर र धरान उपमहानगर पार्टीले गुमाएपछि बाह्रखरीसँग कुरा गर्दै झलनाथले भने, “सरकार लोकप्रिय भएको भए हामी सबैतिर चुनाव जित्थ्यौं । सरकार अलोकप्रिय भयो । त्यसको नतिजा चुनावमा देखियो ।”

उनले समग्र उपनिर्वाचनको नतिजा नेकपाकै पक्षमा भए पनि धरान र भक्तपुरमा गढबढी भएको बताए । उमेदवार चयन लगायतका कुरामा पनि पार्टीले ध्यान पुर्‍याउन नसकेको उनको निचोड छ ।

“समग्र परिणाम नेकपाकै पक्षमा छ । कांग्रेसले जितेका केही वडा हामीले जितेका छौं । गाउँपालिका पनि जित्यौं । तर भक्तपुर धरानमा गढबढी भयो । यसले सरकार र पार्टीको लोकप्रियता मापन गर्छ,” उनले भने ।

उनले पार्टीले छिट्टै उपनिर्वाचन र सरकारको समीक्षा गर्नुपर्ने औंल्याए । “हामी छिट्टै समग्र कामको मूल्याङ्कन समीक्षा गर्छौं । उपनिर्वाचनको परिणाम अगाडि राखेर समीक्षा गर्छौं,” उनले बाह्रखरीसँग भने ।

उनले यो उपनिर्वाचनले सरकार बनाउने, राष्ट्रिय स्तरमा प्रभाव नछाड्ने भए पनि नेकपालाई आफूलाई समीक्षा गर्ने अवसर भएको बताए ।

नेकपाका विदेश मामिला उपप्रमुख विष्णु रिजालले पनि नेकपाका लागि उपनिर्वाचनको परिणाम सुखद् नरहेको निष्कर्ष निकालेका छन् ।

दाङ र कास्कीमा फराकिलो मतान्तर कायम रहेपछि त्यसमा भावना र सहानुभूतिले काम गरेको बताएका छन् । कास्की–२ मा रवीन्द्र अधिकारीको सहानुभूतिको भोट आएको र दाङमा उत्तरकुमार वलीको सहानुभूतिले काम गरेको उनको निष्कर्ष छ ।

“भक्तपुर र धरान फुत्किएका छन् । पार्टी एकताको सङ्क्रमण, विभिन्न तहका सरकारहरूका काम, उम्मेदवार चयन जस्ता कारणहरू आफ्नो ठाउँमा छन्, यस परिणामले हामीलाई थप सजग पक्कै बनाउनुपर्छ,” उनले निर्वाचनको समीक्षा गर्दै भनेका छन् ।

“समय छ, परिणाममुखी काम गरेर मात्रै यसको क्षतिपूर्ति हुन्छ, तर्कले होइन,” उनले नेतृत्वको ध्यानाकर्षण समेत गराएका छन् ।

यता प्रधानमन्त्रीका प्रेस सल्लाहकार तथा प्रचार विभाग उपप्रमुख सूर्य थापाले पार्टीको मत बढेको जिकिर गरेका छन् । “स्थानीय, प्रदेश र संघीय संसदका रिक्त ५२ स्थानमा भएको उपनिर्वाचनमा नेकपाले ३१ (५९.८ प्रतिशत) स्थानमा विजय हासिल गरेको छ । एकताअघि दुई पार्टीले २८ स्थान (५३.८ प्रतिशत) जितेका थिए । अहिले ३ सीट (५.८ प्रतिशत) बढी हासिल भयो,” उनले दाबी गरेका छन् ।

यसबाट सरकार र पार्टीको अनुचित आलोचना जनताले अश्वीकार गरेको स्पष्ट भएको उनको दाबी छ ।

प्रतिकृया दिनुहोस
ad