भोलि आइतवार दक्षिण एसियाली खेलकुद (साग)को १३ औं संस्करणको उद्घाटन हुँदैछ । उपनिर्वाचनका लागि शनिवार मतदान हुने भएकाले सञ्चार माध्यमको ध्यान भने सागप्रति अपेक्षाकृत कम गएको देखिएको छ । सम्भवतः निर्वाचन परिणाम घोषणा हुँदासम्म पनि सञ्चार माध्यम र नेपाली समाजको ध्यान राजनीतितिरै जानेछ । सञ्चार माध्यमका आधारमा अड्कल काट्ने हो भने खेलकुदप्रति नेपालीहरूको चासो राजनीतिभन्दा कमै देखिन्छ । राजनीतिप्रति जति वितृष्णा प्रकट गरे पनि चुनावमा नेपालीहरू बढी नै रुचि राख्छन् । जेहोस्, भोलिदेखि पक्कै पनि धेरैको ध्यान सागप्रति केन्द्रित हुनेछ । संयोग, नेपालमै सचिवालय रहेको दक्षिण एसियाली क्षेत्रीय सहयोग संगठन (सार्क)भन्दा भने दक्षिण एसियाली खेल (साग)प्रति नेपाली समाजमा बढी रुचि देखिएको छ । 

नेपालले सागलाई सफल बनाउन लामै तयारी गरेको छ । यद्यपि, खेलको तयारीमा भन्दा बढी ध्यान भने उद्घाटन समारोहलाई भव्य बनाउनका लागि दिइएको देखिएको छ । काठमाडौं, पोखरा र जनकपुरमा गरी सम्पन्न हुने खेल प्रतियोगिताहरूका लागि पूर्वाधार निर्माण अझै पनि भइरहेको छ । कतिपय पूर्वाधार निर्माण त प्रतियोगिता सकिँदा पनि समाप्त नहुने लक्षण देखिएको छ । निर्माणका गुणस्तरमा पनि प्रश्न उठ्ने गरेको छ । तैपनि, यस्तो विशाल खेलकुद आयोजना गर्नु आफैँमा गौरवको विषय हो । यसैले सागको आयोजनामा सक्रिय सम्बन्धित सबै धन्यवादका पात्र बनेका छन् । तर, प्रतियोगिता तयारीका क्रममा अनियमितता र अनुचित कार्य भएको रहेछ भने पनि क्षम्य हुनुहुँदैन । अनियमतिताको निगरानी गर्नुपर्ने राज्यका निकायहरू सजग रहनुपर्छ ।

साग खेलकुद प्रतियोगिता त हुँदै हो दक्षिण एसियाको ठूलो ‘मेला’ पनि हो । यसैले खेल प्रतियोगिताहरू सुव्यस्थित र अनुशासितरूपमा सञ्चालन गर्न आयोजक राष्ट्रका रूपमा नेपालले बढी ध्यान दिनुपर्छ । साथै, नेपालीमात्र हैन विदेशी खेलाडीहरूसमेतको स्वास्थ्य र सुरक्षामा पनि नेपालले विशेष ध्यान दिनुपर्छ । घरेलु मैदानमा नेपाली खेलाडीका प्रशंसक धेरै हुनु स्वाभाविकै हो तर अरू देशका खेलाडीलाई अत्याउने वा होच्याउने व्यवहार नेपालीले गर्नु हुँदैन । त्यसो गर्नु एक त हाम्रो संस्कृतिविपरीत हुन्छ भने अर्कातिर नेपाली खेलाडीका लागि अर्को मुलुकमा अनावश्यकरूपमा शत्रुताको बीजारोपण गर्नुजस्तो हुन्छ । सकेसम्म खेलाडीहरूले कुनै कठिनाइ सहनु नपर्ने व्यवस्था मिलाउन पनि आयोजकहरूले ध्यान दिनुपर्छ । दक्षिण एसियामा खेलाडीलाई उपेक्षा गर्ने र खेल अधिकारीहरूले मेजमानी पाउने चलन छ । खेल अधिकारीहरूको उपेक्षा नगरौँ तर खेलाडीलाई हेप्ने व्यवहार पनि नेपालका आयोजकहरूले नगरून् । नेपालले आतिथेय मुलुकका रूपमा दक्षिण एसियाली खेलाडीको मन जित्न गर्नसक्ने उपाय यही हो । 
दक्षिण एसियाली खेलमा सहभागी सबै खेलाडीको स्वागत गर्दै हामी नेपाली खेलाडीहरूलाई राष्ट्र इज्जत बढाउने गरी खेल्ने सफलता प्राप्त होस् भन्ने कामना गर्छौँ ।