काठमाडौं । मोटरसाइकल ओभरटेक गरेको निहुमा कञ्चनपुरमा एक युवकलाई कुटेर हत्या गर्ने चारजना पक्राउ परेका छन । बिहीबार भीमदत्त नगरपालिका–१८ गोबरैयामा २२ वर्षीय दीपक पन्तले मोटरसाइकल ओभरटेक गरेको भन्दै चारजनाको समूहले चक्कु र हेलमेट प्रहार गरेर हत्या गरेका थिए ।

दीपक वुवासँगै मोटरसाइकलमा सवार थिए । जिल्ला प्रहरी कार्यालय कञ्चनपुरका डीएसपी नरेन्द्र चन्दले घटनामा संलग्न रहेको आरोपमा चारजनालाई  पक्राउ गरिएको जानकारी दिए । घटनाबारे पत्रकार सम्मलेन गर्ने तयारी भइरहेको डीएसपी चन्दले बताए । प्रहरी स्रोतका अनुसार घटनामा संग्लन रहेको आरोपमा १९ वर्षीय  विनोद बोहरा, २२ वर्षीय मनिष नाथ, २० वर्षीय नवीन सिंह र २२ वर्षकै गणेश लुहारलाई पक्राउ गरिएको छ ।

मोटरसाइलमा सवार पन्तलाई चारजनाको समूहले आफूहरुको स्कुटरलाई किन ओभरटेक गरेको भन्दै कुटपिट गरेका थिए । कुटपिटबाट घाइते पन्तलाई महाकाली अस्पतालमा उपचार सम्भव नभएपछि भारत रेफर गरिएको थियो । भारत लैजादै गर्दा उनको बाटोमा ज्यान गएको हो । स्थानीयले दोषीमाथी कारवाहीको माग गरेका छन् । मृतकको शव महाकाली अञ्चल अस्पतालमा राखिएको छ ।