काठमाडौं । प्रमुख प्रतिपक्षी दल नेपाली कांग्रेसका सभापति शेरबहादुर देउवा र नेशनल डेमोक्रेटिक इन्स्टिच्युट (एनडीआई) का प्रमुखबीच भेटवार्ता भएको छ । 

सोमबार बेलुका ५ बजे सभापति देउवाको निजी निवास बुढानिलकण्ठ पुगेर देउवासँग बर्माका लागि अमेरिकी पूर्वराजदूतसमेत रहेका एनडीआई प्रमुख डिरेक मिशेल, एनडीआईका एसिया-प्यासिफिक क्षेत्रका क्षेत्रीय निर्देशक मनप्रित सिंह आनन्द र नेपालका लागि सिनियर कन्ट्री डाइरेक्टर डेबोरा हेलीले भेट गरेको सभापति देउवाको सचिवालयले जानकारी दिएको छ । 

भेटका क्रममा सभापति देउवाले नेपालीले लोकतन्त्रको पक्षमा काम गरिरहेको बताएका थिए । एनडीआई प्रमुख मिशेलले नेपालमा कम्युनिस्ट पार्टीको सरकार आएपछि कस्तो छ भन्‍ने प्रश्नमा सभापति देउवाले भने, "प्रजातन्त्र , प्रेस, मानवअधिकारको हनन भएको छ । संघीय लोकतान्त्रिक गणतन्त्रको रक्षा गर्ने पार्टी नेपाली कांग्रेस हो ।" 

एनडीआईले गरेको सहयोगप्रति सभापति देउवाले धन्यवाद व्यक्त गर्दै आगामी दिनमा सम्बन्ध थप प्रगाढ हुनेमा विश्वास व्यक्त गरे । 

एनडीआई अमेरिकाबाट लोकतन्त्रका पक्षमा काम गर्ने एक गैरनाफामुखी संस्था हो । यसले विश्वभर रहेका लोकतान्त्रिक संस्थाहरुलाई बलियो बनाउने विषयमा काम गर्छ ।