काठमाडौं । नेपाल कम्युनिष्ट पार्टीका नेता भीम रावलले प्रधानमन्त्री एवं पार्टी अध्यक्ष केपी ओलीमाथि कटाक्ष गरेका छन् । सोमबार काठमाडौंमा आयोजित सीमासम्बन्धी अन्तरक्रियामा बोल्दै प्रधानमन्त्री ओलीप्रति कटाक्ष गरेका हुन् । 

उनले सूर्य अचेल केपी ओलीको गाउँबाट उदाउने गरेको भन्दै ओलीलाई कटाक्ष गरे । 

“कोही कोही मान्छे त भन्थे, सूर्य भीम रावलको गाउँ पश्चिमबाट उदाउँछ । सूर्य झापाबाटै उदाएको देख्छु । अग्ला अग्ला टावर बनाउँदा पनि त्यही बनेको देख्छु । हुँदा हुँदा प्रदेशको नाम राख्दा १ नम्बर पनि उतैबाट राखेको देख्छु,” नेता रावलले भने, “अनि महोदयहरु, सुदूरपश्चिमबाट कहाँ सूर्य उदायो मलाई देखाइदिनुस् न । मैले क्षेत्रीयताको कुरा गरेको होइन । इतिहासका यथार्थका पाना पल्टाएको मात्र हो ।” 

उनले आफूले राष्टियताको कुरा उठाउँदा पार्टी भित्रै प्रतिपक्षी भनिएकोमा पनि असन्तुष्टि जनाए । उनले आफू प्रतिपक्षी नभई पार्टीको प्रतिरक्षक भएको पनि बताए ।