काठमाडौं । ग्लोबल आइएमई बैंकको १३ औं वार्षिक साधारणसभा सम्पन्न भएको छ । आव २०७५-०७६ मा आफ्ना सेयरधनीलाई १२.७५ प्रतिशत बोनश सेयर र १२.७५ प्रतिशत नगद लाभांश गरी २५.५ प्रतिशत लाभांश दिने निर्णय पारित गर्दै बैंकको साधारणसभा सम्पन्न भएको हो ।

बैंकले गत आवमा २ अर्ब ७६ करोड रुपैयाँ खुद मुनाफा आर्जन गरेको थियो । बोनश सेयर वितरण पश्चात बैंकको चुक्तापुँजी ११ अर्ब ७६ करोड रुपैयाँ पुग्नेछ ।

साथै, साधारणसभाले जनता बैंक नेपाललाई ग्लोबल आइएमई बैंक लिमिटेडमा गाभ्ने प्रस्ताव पनि पारित गरेको छ । साधारणसभाबाट पारित भएसँगै दुई बैक मर्जरका लागि नेपाल राष्ट्र बैक समक्ष अन्तिम स्वीकृती प्राप्त गरी ग्लोबल आईएमइ बैक लिमिटेडको नामबाट एकिकृत कारोवारका लागि अन्तिम तयारी भइरहेको बैंकले जनाएको छ । साधारण सभाले बैंकको अधिकृत पुँजी १६ अर्ब रुपैयाँलाई वृद्धि गरी २५ अर्ब रुपैयाँ कायम गर्ने विशेष प्रस्तावसमेत पारित गरेको छ ।

साधारणसभामा बोल्दै बैंकका अध्यक्ष चन्द्रप्रसाद ढकालले बैंकले मंसिर महिनाभित्र एकीकृत कारोबार सुरुगर्ने योजना रहेको बताए । मर्जरपछि ग्लोबल आइएमई देशकै सबैभन्दा ठूलो र सबल बैंक बन्ने बताउँदै उनले सेयरधनीको आकांक्षाअनुरुप आगामी दिनमा अझै सर्वसुलभ बैंकिङ सेवा प्रदान गर्ने प्रतिवद्धता व्यक्त गरे । दुई बैंकले गत असार २० गते मर्जरका लागि प्रारम्भिक सहमती गरेका थिए भने कार्तिक ८ गते मर्जर सम्बन्धी अन्तिम सम्झौतापत्रमा हस्ताक्षर गरेका थिए ।

मर्जर पछि बन्ने बैंकको नाम ग्लोबल आइएमई बैंक, अध्यक्ष चन्द्रप्रसाद ढकाल हुने सहमति गरिएको छ भने सञ्चालक समितिमा ग्लोबलको तर्फबाट ५ जना र जनताको तर्फबाट २ जना रहने सहमति भएको छ । त्यस्तै मर्जरपछि बन्ने बैंकको कार्यकारी प्रमुख अधिकृत परशुराम कुँवर क्षेत्री र वरिष्ठ नायव कार्यकारी प्रमुख अधिकृत महेश शर्मा ढकाल हुने सहमति भएको छ ।

मर्जरपछि ग्लोबल आइएमई बैंक नेपालकै ठूलो बैंक बन्नेछ । बैंकको चुक्तापुँजी करिब १९ अर्ब, कुल निक्षेप २ खर्ब १० अर्बभन्दा बढी र कुल कर्जा लगानी करिब २ खर्ब पुग्नेछ । त्यस्तै बैंकको शाखा सञ्जाल करिब ३ सय तथा सेवा केन्द्रको संख्या ८ सय ५० भन्दा बढी हुनेछ । बैंकमा ३ हजार २ सय ५० भन्दा बढी कर्मचारीहरु रहनेछन् ।त्यस्तै बैंकको २ सय ५६ एटीएम, २ सय ४१ शाखा रहित बैंकिङ सेवा, ३३ एक्सटेन्सनतथा राजस्व संकलन काउन्टर ३ वटा वैदेशिक सम्पर्क कार्यालय र करिब २० लाख ग्राहक संख्या रहने बैंकले जानकारी दिएको छ ।