काठमाडौं । विभागीय नेपाल पुलिस क्लब राजधानीमा जारी तेस्रो संस्करणको चन्द्रागिरी मेयर गोल्डकप ‘ए’ डिभिजन फुटबल प्रतियोगिताको क्वाटरफाइनलमा प्रवेश गरेको छ ।

पुलिसले जावलाखेलमाथि २-१ को पुनरागमन जित निकाल्दै प्रतियोगिताको अन्तिमा आठमा स्थान बनाएको हो ।

पुलिसको जितमा भोला सिलवाल  र प्रवेश दनुवारले एक-एक गोल गरे । जावलाखेलका लागि विदेशी खेलाडी एडमा डम्बियाले एक गोल फर्काए ।

नैकाप फुटबल मैदानमा सोमबार भएको खेलको चौथो मिनेटमा नै एडमा डम्बियाको गोल गर्दै जावलाखेललाई अग्रता दिलाएका थिए ।

पहिलो गोल गरेसँगै खेलमा हौसिएको जावलाखेलले पुलिसलाई लगातार दवावमा राखेपनि थप गोल गर्न सकेन । 

खेलको ५३ औँ मिनेटमा सुमन लामाको उत्कृष्ट मुभमा भोला सिलवालले गोल गर्दै खेल १–१ गोलको बराबरीमा ल्याएका थिए ।  खेलको ७४ औँ मिनेटमा प्रवेश दनुवारले वान भर्सेस वानको अवस्थामा गोल गर्दै पुलिसलाई २–१ को पूनरागमन जित दिलाए ।

अब पुलिसले क्वाटरफाइनलमा गत वर्षको विजेता च्यासल युथ क्लबसँग ७ मंसिरमा प्रतिस्पर्धा गर्नेछ ।