काठमाडौं । माथिल्लो त्रिशुली थ्री ‘ए’ आयोजनाले व्यवसायिक विद्युत उत्पादन सुरू गरेको छ । आयोजनाको पहिलो र दोस्रो युनिटले उत्पादन थालेका हुन् । 

यससँगै ६० मेगावाट विद्युत राष्ट्रिय प्रसारणलाइनमा जोडिएको छ । रसुवामा रहेको आयोजनाको उद्घाटन प्रधानमन्त्री केपी शर्मा ओलीले प्रधानमन्त्री तथा मन्त्रिपरिषद्को कार्यालयमा रहेको ‘एक्सन रुप’ बाट उद्घाटन गरे । 

आयोजनाको उद्घाटन गर्दै प्रधानमन्त्री ओलीले मुलुकको अर्थतन्त्रलाई बलियो जगमा उभ्याउने बताए । सरकार देशलाई बलियो अर्थतन्त्रको जगमा उभ्याउन अग्रसर रहेको भन्दै उनले यस आयोजनाको सञ्चालनले विद्युत आयात कम गरी विद्युतीय ऊर्जालाई कृषिको आधुनिकीकरण र उद्योग सञ्चालनमा लगाउन मदत पुग्ने बताए । “निर्माणको चरणमा रहेका यस्ता धेरै आयोजना सम्पन्न गरेर मुलुकलाई बलियो अर्थतन्त्रको जगमा उभ्याउँदै छौं”,उनले भने । 

प्रधानमन्त्री ओलीले विकासका दूरगामी आयोजनाहरु निर्माण गर्दा अनुचित मुआब्जा खोज्ने प्रवृत्तिले विकास निर्माणमा ढिलाई र लागत बढ्ने गरेको पनि बताए । 

“आफूले कर तिर्दा कमभन्दा कम मूल्य राख्ने र मुआब्जा लिनु पर्दा बढी रकम खोज्ने प्रवृत्ति बढेको छ” उनले भने, “यसबाट कम मूल्यमा धेरै विकास परिमाण हासिल गर्न र समयमै पूर्वाधार विकासको काम सक्न अवरोध पुग्ने गरेको छ । यस्तो प्रवृत्तिलाई त्याग्नु पर्छ ।” 

यो आयोजना सुरुमा अनुमान गरिए भन्दा करिब ३ अर्ब बढी लागतमा निर्माण सम्पन्न भएको हो । सुरुमा आयोजनाको अनुमानित लागत १४ अर्ब ४३ करोड थियो । 

निर्माण सम्पन्न हुँदासम्म लागत बढेर १७ अर्ब ३२ करोड पुगेको जनाइएको छ । नेपाल विद्युत प्राधिकरण र चिनियाँ एक्जिम बैकको १२ करोड ५८ लाख अमेरिकी डलर सहुलितपूर्ण ऋण लगानी आयोजना सम्पन्न भएको हो । ६० मेगावाटको आयोजना हिउँदमा भने करिब ४५ मेगावाट विद्युत उत्पादन गर्ने जनाइएको छ ।