जनतालाई पटकपटक सास्ती दिन सकिन्छ तर सधैँका लागि जित्न सकिँदैन । लाग्छ, नेपाली जनता पुराणमा वर्णित देउता हुन् । दानवहरूले पटकपटक जितेर स्वर्गबाट लखेटे पनि अन्ततः कुनै न कुनै उपाय वा कसै न कसैको सहयोगबाट उनीहरू स्वर्गमा फेरि फर्कन्छन् । शासकहरूका प्रियपात्र ठेकेदारहरूले काठमाडौंमात्र हैन देशभर निर्माण कार्यको ठेक्का लिने र काम नगरी अलमल्याउने गरेर जनतालाई सताउनुसम्म सताएका छन् । यस्ता सडक वा अन्य निर्माण सम्भार परियोजनाको नाम गनेर पनि साध्य छैन । सम्भवतः सरकारको कुनै निकायसँग पनि यसरी अलपत्र पारिएका योजनाको विवरण छैन । तर, जनताले यी धिङ्न्याहाहरूलाई तह लगाउने उपाय पहिल्याएजस्तो छ । नगरकोट जाने सडक खनेर अलपत्र छाड्ने ठेकेदारको तस्बिर छापिएको पोस्टर मोटर र बाटाघाटामा टाँस्न थालेपछि धमाधम काम थालिएको समाचार छ । 

नगरकोट सडकमा भएको लापरबाहीबाट आजित भएका जनताले ठेकेदारलाई तह लगाउन गरेको उपाय काम थालेको छ । त्यहाँ धमाधम काम भइरहेको बताइएको छ । नगरकोटमा काल लागेको देखेपछि अन्यत्र पनि त्यस उपायको सिको हुन थालेको छ । खाडीचैर — चरीकोट खण्डको सडक विस्तारमा पनि ठेकेदारले काममा लापरबाही गर्दा जनता आजित भएका थिए । त्यहाँ पनि ठेकेदारको तस्बिर छापिएको पोस्टर जताततै टाँस्न थालिएको छ । सम्भवतः चरीकोट सडकमा पनि नगरकोटको उपाय काम लाग्नेछ । हुनत, नगरकोट सडकमा भक्तपुरमा प्रदेशसभाको उपनिर्वाचनका कारण सुरु भएको अनुमान पनि गरिएको छ । त्यहाँका ठेकेदार सत्तारुढ नेपाल कम्युनिस्ट पार्टी (नेकपा)का अध्यक्षका घरबेटी भएकाले चुनावमा नराम्रो सन्देश जान नदिन काम थालिएको पनि हुनसक्छ । तर, ठेकेदारको बदमासी सार्वजनिक गर्ने जनताको अभ्यासले तिनलाई पक्कै पनि तर्साएको छ । 

ठूला निर्माण कार्यमा यस्ता शासकहरूका कृपापात्रहरूले राज्यको ढुकुटीमा खुलायाम डकैती गरेका छन् भने ससाना निर्माण परियोजनामा स्थानीय तहका पदाधिकारीले जनतालाई दुःख दिइरहेका समाचार सार्वजनिक भएका छन् । स्थानीय तहबाट सञ्चालन गरिएका निर्माण योजनामा पादधिकारीहरूले आफ्ना निर्माण औजार भाडामा प्रयोग गर्न उपभोक्ता समितिलाई दबाब दिने त्यसो नगर्नेहरूको भुक्तानी नदिने गरेको समाचार सार्वजनिक हुन थालेको छ । अहिले प्रदेश नम्बर ३ मा पर्ने मकवानपुर र धादिङबाट यस्ता समाचार आएका छन् । ठेकेदारको तस्बिर सार्वजनिक गर्ने उपायको सिको गरिएजस्तै स्थानीय तहमा हुने यस्ता बदमासीहरू पनि बिस्तारै उजागर हुनेछन् । त्यसले समस्या समाधानमा सहयोग पनि पुग्नेछ । ठेकेदारको तस्बिर प्रदर्शनदेखि स्थानीय तहका पदाधिकारीसम्मको पोख खोल्ने अभियानले सम्बन्धित जनता जुझारु र सजग हुने हो विसंगति अन्त्य गर्न सम्भव छ भन्ने सन्देश दिएको छ । अर्थात्, अन्याय र शोषण नसहने हो जनता पनि उत्तिकै चनाखो र संघर्षशील हुनु जरुरी रहेछ । सहनुको पनि त सीमा हुन्छ नि !