काठमाडौं । निजामती कर्मचारीले ६० वर्ष उमेर भएसम्म सेवा गर्न पाउने भएका छन् । संघीय संसदको राज्य व्यवस्था तथा सुशासन समितिको बिहीबार सिंहदरबारमा बसेको बैठकले निजामती सेवाको कर्मचारीको सेवा अवधिको उमेर हद ६० वर्ष पुर्याउने निर्णय गरेको हो । 

निजामती सेवाका कर्मचारीहरुको पनि अवकाश अवधि स्वास्थ्य सेवाका कर्मचारी सरह नै ६० वर्ष पुर्याउने निर्णय गरिएको समितिका उपसचिव सञ्जय दाहालले जानकारी दिए । तर त्यो हरेक वर्ष ६–६ महिनामा थप गरेर ६० वर्ष पुर्याइनेछ । पदपूर्तिलगायतमा असर नहुने गरी यसको उमेर हद ६–६ महिना थप गरेर ६० वर्ष पुर्याउने निर्णय गर्नुपरेको पनि उपसचिव दाहालले बताए । 

समितिको बैठकमा ‘संघीय निजामती सेवाको गठन, संचालन र सेवाको सर्त सम्बन्धमा व्यवस्था गर्न बनेको विधेयकको मस्यौदा प्रतिवेदन’ माथि पनि छलफल गरिएको थियो । बैठकले कार्य क्षमता र दुर्गम क्षेत्रमा काम गर्ने कर्मचारीलाई बढुवाका लागि बढी नम्बर दिने सहमति पनि गरेको छ ।