काठमाडौं । अघोरी बाबा भनिने विजय केसीकी श्रीमती शारदा पाण्डेविरुद्ध प्रहरीले ठगी अपराधमा अनुसन्धान प्रक्रिया अगाडि बढाएको छ । सोमबार पक्राउ परेकी शारदामाथि झुक्याएर विवाह गराएको आरोप छ । महानगरीय प्रहरी वृत्त बौद्धका डीएसपी रमेशबहादुर सिंहका अनुसार शारदामाथि काठमाडौं जिल्ला अदालतबाट ५ दिनको म्याद थपेर अनुसन्धान प्रक्रिया अगाडि बढाइएको छ ।

किन पक्राउ परिन् शारदा ?

शारदा एक वर्षअघि अमेरिकाबाट नेपाल आइन् । अमेरिकामा उनका पति थिए, गोविन्द अधिकारी । प्रहरीका अनुसार शारदा र उनका पतिबीच सम्बन्ध विच्छेद गर्ने सहमति भएको थियो ।

तर, शारदाले आफ्ना पतिको लागि युवती खोजिदिने सहमति गरिन् । काठमाडौं आएपछि शारदाले एक राष्ट्रिय पत्रिकामा अमेरिकामा बस्ने एक पुरुषलाई ‘डिभोर्सी’ महिला विवाहका लागि चाहिएको भन्दै विज्ञापन प्रकाशित गरिन् ।

विज्ञापनमा शारदाकै मोबाइल नम्बर थियो । शारदाको नम्बरमा काठमाडौंका एकजनाले फोन गरे । उनले चितवनमा बस्ने आफ्नी भतिजी विज्ञापनमा खोजेजस्तो महिला भएको र विवाह गर्ने बताए ।

शारदा र चितवनकी महिलाका आफन्तका बीचमा कुराकानी भएपछि उनले अमेरिकमा रहेका पति गोविन्द अधिकारीलाई नेपाल बोलाइन् । गोविन्द नेपाल आए । शारदाले उनलाई आफ्नो दाइ भनेर चिनाइन् युवतीसँग । 

अमेरिका जाने लोभमा ती महिला र गोविन्दको विवाह भयो । केही समय गोविन्द ती महिलासँग बसे । तर नेपालमा रहँदा विवाह दर्ता लगायतका कानुनी प्रक्रिया पूरा गरेनन् । केही समयपछि नयाँ श्रीमतीलाई यहीँ छाडेर गोविन्द अमेरिका गए । उनलाई केही समयपछि अमेरिका बोलाउने आश्वासन दिए । 

शारदा पनि अमेरिका गइन् । विवाह भइसकेपछि नेपालमा रहेकी ती महिलाले केही समयपछि गोविन्दको नम्बरमा फोन गरिन् । तर, फोन गोविन्दले नभएर शारदा पाण्डेले उठाइन् । त्यसपछि ती महिला सशंकित बनिन् किनकी शारदाले गोविन्दलाई आफ्नो दाइ भनेर चिनाएकी थिइन् । 

डिएसपी सिंह भन्छन्, ‘‘शारदाले फोनमा ती महिलालाई चितवनमा रहेको जमिन बेचेर ७० लाख पठाएपछि विवाह दर्ता र अमेरिका ल्याउने प्रक्रिया सुरु गर्ने भनेकी रहिछन् । ती महिलाले आफ्नै श्रीमानले अमेरिका बोलाउन ७० लाख किन मागे भनेर खोजी गर्दै जाँदा शारदा र गोविन्द पति–पत्नी भएको जानकारी पाइन् ।’’ 

यसक्रममा शारदाले पनि आफू गोविन्दकी श्रीमती भएको बताइसकेको प्रहरी बताउँछ । उनीहरु दुवै मिलेर रकम लुट्ने योजनाअनुसार नै विवाहको नाटक गरेको प्रहरीको दाबी छ । अनुसन्धानका क्रममा शारदाले अघोरी बाबासँग तेस्रो विवाह गरेको खुलेको छ । गोविन्दसँग विवाह गर्नुअघि समेत शारदाले विवाह गरेर सम्बन्ध विच्छेद गरिसकेकी थिइन् ।