काठमाडौं । सत्तारूढ नेपाल कम्युनिस्ट पार्टीले महोत्तरीको पिपरा गाउँपालिकाको अध्यक्षमा विक्रम चौधरीलाई उठाउने निर्णय गरेको छ । कात्तिक २५ गते बसेको पार्टी प्रदेश कमिटीको बैठकले मङ्सिर १४ गतेको उपनिर्वाचनमा चौधरीलाई उठाउने निधो गरेको हो ।

बैठकले प्रदेश २ मा व्याप्त भ्रष्टाचार, अनियमितताविरुद्ध ‘प्रदेश नम्बर २ सरकारको भ्रष्टाचारविरुद्ध हुलाकी अभियान’ सञ्चालनमा ल्याउने निर्णय गरेको छ ।

प्रदेश नम्बर २ मा भ्रष्टाचार बढेको, समाजवादी र राष्ट्रिय जनता पार्टी, नेपालको गठबन्धन सरकार भ्रष्टाचारमा लिप्त भएको, विकास आयोजना, प्रदेश सरकारको अभियानमा समेत भ्रष्टाचार बढेको भन्दै ‘भण्डाफोर’ अभियान चलाउने निष्कर्षमा पुगेको छ ।

बैठकले रोतहट जिल्ला कमिटीको नामावलीमा आवश्यक संशोधन गरेको जनाएको छ ।

जिल्ला कमिटीमा सिनियर र यसअघि जिम्मेवारीमा रहेकाहरू समावेश नगरिएको भन्दै असन्तुष्टि बढेको थियो र प्रदेश कमिटीले शपथ गराउनसमेत सकेको थिएन ।

नेकपा प्रदेश नम्बर २ कमिटीले आगामी मङ्सिर १० गते अन्तरक्रिया कार्यक्रमको आयोजना गर्ने भएको छ । अन्तरक्रियामा प्रदेश नम्बर २ को विकास, समृद्धिमा राष्ट्रिय गौरबका आयोजनाको महत्त्व स्थापित गर्ने कुरा प्रमुख हुने अध्यक्ष प्रभु साहले जानकारी दिएका छन् ।