काठमाडौं । नेपाली कांग्रेसका नेता दिलेन्द्रप्रसाद बडूले कालापानी र लिपुलेकको विवाद समाधानका लागि सरकारले तत्काल कूटनीतिक पहल गर्नुपर्ने बताएका छन् । गृहजिल्ला दार्चुलामा रहेका नेता बडूले लामो समयदेखिको सीमासम्बन्धी विवाद समाधानका लागि सरकारले कूटनीतिक कौशलता र गम्भीरता देखाउनुपर्नेमा जोड दिए ।
उनले यसअघि सरकारको नेतृत्व सम्हालेका राजनीतिज्ञ र राजनीतिक दलहरुको कूटनीतिक कौशलता र गम्भीरताको अभावमा भारतसँगको सीमा विवाद बल्झिदै गएको जिकिर गरे ।
कालापानी, लिपुलेक क्षेत्रमा देखिएको विवाद समाधानमा ढिलाई हुनुको कारण के हो भन्ने बाह्रखरीको प्रश्नमा उनले टेलिफोनमा भने, “यो विषय गम्भीरतापूर्वक एजेण्डा बनेन, दुःखद हो । कूटनीतिक कौशलता र कुटनीतिक गम्भीरताको अभावले नै हो । अब सरकारले कूटनीतिक कौशलता र गम्भीरता देखाउनुपर्छ । हामी सबै यसमा गम्भीर बन्न अति नै आवश्यक छ ।”
उनले भारतले हालै सार्वजनिक गरेको नयाँ नक्साप्रति आपत्ति जनाउँदै भारतलाई उक्त नक्सा परिवर्तनका लागि सरकारले कूटनीतिक पहल अघि बढाउनु पर्ने आवश्यकता औंल्याए ।
प्रतिनिधिसभा सदस्यसमेत रहेका नेता बडूले यसअघि आफूले संसद बैठकमा कालापानी र लिपुलेकको विषय उठान गर्दै आएको स्मरण गराउँदै अब सरकारले सीमा विवाद समाधान गरेर सीमा क्षेत्रमा नेपाली सेना वा अधैसैनिक बल तैनाथ गर्नुपर्ने बताए ।
उनले दार्चुलाको सीमा क्षेत्रमा सरकारले शसस्त्र प्रहरी तैनाथ गर्ने भन्दै गाउँ नजिकै पेस्ट स्थापना गर्ने तयारी भइरहेको प्रति आपत्ति जनाए । “सरकारले सीमा क्षेत्रमा अर्धसैनिक बल खटाउने निर्णय गरिसकेको छ,” बडूले भने, “तर, त्यसलाई गाउँ नजिकै स्थापना गर्ने तयारी भइरहेको सुनिएको छ । जुन सरासर गलत हो । सरकारले भारत जस्तै सीमा क्षेत्रमै सुरक्षाकर्मी खटाउनुपर्छ ।” उनले उक्त क्षेत्रमा खटिने सुरक्षाकर्मीलाई बाह्रै महिना बस्न सकिने व्यवस्थासमेत गर्नुपर्नेमा जोड दिए ।
नेता बडूले राष्ट्रियताका सवालमा सत्ता पक्ष र प्रतिपक्ष भनेर दलहरु विभक्त हुन नमिल्ने भन्दै भारतले हालै जारी गरेको नयाँ नक्साको विषयमा सबै दलहरु एक ठाउँमा उभिनुपर्ने जिकिर गरे । उनले सरकारले यो विषयमा गम्भीरतापूर्वक कूटनीतिक पहल गर्नुपर्नेमा जोड दिँदै कांग्रेस सरकारलाई साथ दिन तयार रहेको पनि बताए ।