दक्षिणी थाइल्यान्डस्थित सुरक्षा चेकपोइन्टमा भएको आक्रमणमा परी कम्तिमा पनि १५ जनाको ज्यान गएको छ । सैनिक प्रवक्ताका अनुसार ज्यान गुमाउनेहरुमा प्रहरी अधिकारी र केही ग्रामिण सुरक्षा स्वयंसेवक रहेका छन् ।
मंगलबार भएको उक्त आक्रमण यस वर्षकै सबभन्दा दुखद घटना भएको बताइएको छ । यसअघिको पृथकतावादी अभियानका क्रममा भने हजारौंले ज्यान गुमाएका थिए ।
आक्रमणकारीहरुले यल प्रान्तमा विस्फोटक पदार्थको समेत प्रयोग गरेको र उद्धारकर्मीलाई ढिलो होस् भन्नका लागि सडकसमेत अवरुद्ध गरेका थिए ।
सैनिक प्रवक्ता कर्णेल प्रामोट प्रोमले बुधबार भने, "१२ जनाको घटनास्थलमै ज्यान गएको थियो भने दुईजनाको मंगलबार अस्पतालमा र एकजनाको बुधबार बिहान ज्यान गएको थियो । उक्त आक्रमणमा परी अन्य पाँच जना घाइते भएका छन् ।"
उनले समाचार संस्था एएफपीलाई बताएअनुसार आक्रमणकारीहरले उक्त सुरक्षा चेकपोइन्टबाट एम-१६ राइफल र केही सटगनहरु समेत लगेका छन् ।
उक्त घटनाको कसैले पनि अहिलेसम्म जिम्मा लिएका छैनन् ।
प्रधानमन्त्री प्रायुत चान-ओ-चाले उक्त आक्रमणमा संलग्नलाई कानुनी कठघरामा ल्याइने बताएका छन् ।