सूचना लुकाउन खोजियो भने अडकलवाजी सुरु हुन्छ । यस्तो अडकलवाजी प्रायः नकारात्मक हुन्छ । सूचनाको खडेरीमा भ्रमको बीउ हुर्कछ । यसै पनि सूचना प्रविधिको विकासका कारण एक्काइसौं शताब्दीमा सार्वजनिक महत्त्वको सूचना बिरलै लुकाउन सकिन्छ । लुकाउन खोजेको सूचना सार्वजनिक हुँदा प्रत्युत्पादक बन्न सक्छ । प्रधानमन्त्री केपी ओलीको स्वास्थ्यसम्बन्धी सूचना पनि लुकाउन खोज्दा प्रत्युत्पादक भएकोे छ । प्रधानमन्त्री ओली मिर्गौलाका बिरामी हुन् भन्ने नेपाली जनताले थाहा पाएका छन् । मिर्गौला प्रत्यारोपण गरेका बिरामीको स्वास्थ्य यदाकदा जटिल हुनसक्छ । त्यस्तो अवस्थामा सबैले उपलब्ध र पहुँचभित्रको उत्तम उपचार गराउँछन् र यसलाई अस्वाभाविक मानिदैन । प्रधानमन्त्री ओलीले ग्रान्डी अस्पतालमा उपचार गराउनु पनि यस्तै सामान्य र स्वाभाविक घटना हो । 

अस्वाभाविक त उनको उपचारको यथार्थ लुकाउने प्रयास हो । त्यो प्रधानमन्त्री ओलीको निर्देशनमा नभएको पनि हुनसक्छ । प्रधानमन्त्री ओलीको हालै सिंगापुरमा मिर्गौलाकै जटिल उपचार गरिएको थियो । त्यसपछि पनि उनको उपचार भइरहेकै छ । यस क्रममा उनी अस्पतालमा गइरहनु पर्ने हुनसक्छ । प्रधानमन्त्रीको स्वास्थ्य अवस्था पक्कै पनि सार्वजनिक चासोको विषय हो । त्यसैले प्रधानमन्त्री ओलीको सचिवालयले उनको स्वाथ्य स्थितिका सम्बन्धमा नियमितरूपमै सार्वजनिक जानकारी गराउने व्यवस्था गर्नु जरुरी छ । अहिलेसम्म विशिष्ट व्यक्तिहरूको स्वास्थ्य अवस्थाका सम्बन्धमा कस्तो सूचना, कसरी, कहिले र कस्ले दिने भन्ने विषयमा स्पष्ट कार्यविधि पनि नहुनसक्छ । त्यसैले विवादमा पर्नबाट जोगिन प्रधानमन्त्रीका प्रेस सल्लाहकारलगायत चिकित्सकहरू पन्छिन खोजेको हुनसक्छ । एक्काइसौं शताब्दीको लोकतान्त्रिक समाजमा सूचना लुकाउन खोज्नु जोखिमपूर्ण हुन्छ भन्ने प्रधानमन्त्रीको सचिवालयको बुझ्नु आवश्यक छ । 

सूचना नदिने वा दिन नखोज्ने प्रवृत्तिले भ्रम फैलाउन सक्छ भन्ने त यसैपटक पनि देखिइसकेको छ । अनावश्यक हल्ला फैलन नदिन राष्ट्रपति र प्रधानमन्त्रीको स्वास्थ्य अवस्थाको सूचना नियमितरूपमा सार्वजनिक गर्ने परिपाटी नै बनाउनु उचित हुने देखिन्छ । त्यसका लागि कस्तो सूचना, कुन माध्यमबाट, कस्ले र कहिले सार्वजनिक गर्ने भन्ने स्पष्ट कार्यविधि नै निर्माण गरे हुन्छ । सूचना विज्ञ र चिकित्सकहरू रहेको समूहले स्पष्ट सूचना सार्वजनिक गर्ने गरेमा व्यक्ति विशेषले कोपभाजन हुने डर पनि मान्नुपर्ने छैन । यसो गरिएमा अडकलवाजहरूले भ्रम फैलाउन पनि सक्नेछैनन् । नियमित उपचार गराउँदैमा प्रधानमन्त्री ओली आफ्नो कार्यसम्पादन गर्न असमर्थ छन् वा हुन्छन् भन्ने पक्कै पनि हैन । मात्रामा फरकमात्र हो विगत १२ वर्षदेखि नै उनले उपचार त गराउँदै आएका छन् । सूचना लुकाउन खोजे बरु जनतामा त्यस्तो सन्देश जानसक्छ । प्रधानमन्त्रीको स्वास्थ्य अवस्थासम्बन्धमा भ्रम फैलाउन खोज्नेहरूलाई परास्त गर्न पनि सही सूचना नियमितरूपमा सार्वजनिक गर्नुपर्छ ।