रुसी लडाकू विमान दक्षिण कोरियाली हवाइ क्षेत्रमा प्रवेश गरेको पछि दक्षिण कोरियाले पनि लडाकू विमान उडाएको बताएको छ । मंगलबार रुसी लडाकू विमानले दक्षिण कोरियाली हवाइ क्षेत्रमा प्रवेश गर्दै कोरियाली हवाइ रक्षा क्षेत्रको उल्लंघन गरेको दक्षिण कोरियाली सेनाले पुष्टि गरेको छ ।
छ घण्टाको अवधिमा छवटा रुसी लडाकू विमान कोरियाली हवाइ प्रतिरक्षा क्षेत्रमा प्रवेश गरेको बताइएको छ । सियोलस्थित सैनिक मुख्यालयका उपप्रमुखले भने, "मंगलबार बिहान ९:२३ बजेदेखि रुसी लडाकू विमान कोरियाली हवाइ प्रतिरक्षा क्षेत्रमा प्रवेश गरेका थिए ।"
यसवर्ष रुसी सैन्य विमानले कोरियाली हवाइ रक्षा क्षेत्रमा २० औं पटक प्रवेश गरेको दक्षिण कोरियाली सैन्य कार्यालयले जनाएको छ । "हामीले तत्कालै हाम्रो लडाकू विमान पठाएर उनीहरुको निगरानी गरेका थियौं र तत्कालै चेतावनीको सन्देश प्रसारण गरेका थियौं," दक्षिण कोरियाली सैन्य उपप्रमुखले जारी गरेको विज्ञप्तिमा भनिएको छ ।
तर, सियोलस्थित रुसी दूतावासले भने यस विषयमा कुनै प्रतिक्रिया दिएको छैन । यसअघि जुलाईमा पनि रुसी बमवर्षक विमानहरुले दक्षिण कोरियाली हवाइ सैन्य क्षेत्रको उल्लंघन गरेपछि दक्षिण कोरियाले सयौं चेतावनीपूर्ण प्रहार गरेको थियो ।
त्यसबेला रुसले चीनसँगको लामोदूरीको संयुक्त हवाइ गस्ती गरेको बताएको थियो । तर, मंगलबार भने कुनै चेतावनीपूर्ण प्रहार भने गरिएन ।
रोयटर्स