काठमाडौं । प्रधानमन्त्री केपी शर्मा ओली र प्रमुख प्रतिपक्षी दल नेपाली कांग्रेसका सभापति शेरबहादुर देउवाबीचको सहमतिमा संवैधानिक परिषदको बैठक स्थगित भएको छ । सत्तारुढ दल र प्रतिपक्षी दलबीचको सहमतिमै द्वन्द्वकालीन मुद्दाहरू समाधान गर्ने र ऐन निर्माण टुंगोमा पुर्याउनुपर्ने सभापति देउवाको प्रस्तावमा प्रधानमन्त्री ओली सकारात्मक देखिएपछि मंगलबारका लागि बोलाइएको परिषद् बैठक स्थगित भएको हो ।

बूढानीलकण्ठस्थित आप्mनै निवासमा समसामयिक राजनीतिक विषयमा छलफल गर्न मंगलबार बिहान बोलाइएको पदाधिकारी बैठक चलिरहेका बेला सभापति देउवाले प्रधानमन्त्री ओलीलाई टेलिफोन गरेर परिषद् बैठकअघि सत्ता र प्रतिपक्षको धारणा सहमतिमै बनाउनुपर्नेमा जोड दिएका थिए ।

“छलफल चलिरहेकै बेला सभापति र प्रधानमन्त्रीबीच टेलिफोनमा सहमति गरेर अगाडि जाने विषयमा कुराकानी भएको थियो,” बूढानीलकण्ठमा भएको छलफलमा सहभागी केन्द्रीय सदस्य रमेश लेखकले भने, “फेरि प्रधानमन्त्री विदेश भ्रमणमा जाने पनि तय भएको रहेछ । उहाँ भ्रमण सकेर स्वेदश फर्किएपछि मात्रै संवैधानिक परिषद् बैठक बस्ने भएको छ ।”

प्रधानमन्त्री ओली असंलग्न राष्ट्रका प्रमुखहरूको १८ औं शिखर सम्मेलनमा सहभागी हुन बिहीबार अजरबैजानको राजधानी बाकु जान लागेका छन् । उनले सोमबार बालुवाटारमा नेकपाका अध्यक्ष पुष्पकमल दाहाल र कांग्रेस सभापति देउवासँग सत्यनिरूपण तथा मेलमिलाप आयोग र बेपत्ता छानबिन आयोग गठनका बारेमा छलफल गरेका थिए ।

बूढानीलकण्ठमा बसेको पदाधिकारी बैठकमा नेताहरुका बीचमा संक्रमणकालीन न्याय, संवैधानिक परिषद् बैठक र बिहीबार बस्न लागेको पार्टीको केन्द्रीय कार्यसमिति बैठकका बारेमा छलफल भएको नेता लेखकले जानकारी दिए । 

बैठकमा सभापति देउवा, वरिष्ठ नेता रामचन्द्र पौडेल, उपसभापति विमलेन्द्र निधि र विजयकुमार गच्छदार, महामन्त्री डा. शशांक कोइराला, सहमहामन्त्री डा. प्रकाशरण महत, कोषाध्यक्ष सीतादेवी यादव, प्रवक्ता विश्वप्रकाश शर्मा, केन्द्रीय सदस्यहरु रमेश लेखक र डा मिनेन्द्र रिजाललगायतका नेताहरु सहभागी थिए ।