काठमाडौं । सत्तारूढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीसँग असमझदारी बढेको ठान्नु भ्रम भएको बताएका छन् ।

पाँचथरमा मङ्गलबार आयोजित पार्टीको प्रशिक्षण कार्यक्रममा उनले भने, “तपाईंहरू के भ्रममा नपर्नूहोस् भने कहिलेकाहीँ मिडियामा आउने एक दुईवटा कुराले ठूलै केही पो छ कि भन्ने लागेको छ भने त्यो भ्रम हो । हिजोमात्रै पनि प्रधानमन्त्री र म दुई घण्टा बसेर समग्र परिस्थितिलाई कसरी लाने भनेर समीक्षा गरेका छौं । फेरि एउटा समझदारीमा अगाडि जाने सङ्कल्पसहित आएका छौं । अरू होहल्ला र प्रचारबाजीमा नलाग्न अनुरोध गर्छु ।”

अध्यक्ष प्रचण्डले पार्टी एकताका बेला भएका सहमति, समझदारी कार्यान्वयन नभएको भए पार्टी अघि बढ्न नसक्ने बताए । बाँकी सहमति पनि एकता महाधिवेशनका बेलासम्म पूरा हुने विश्वास उनको थियो ।

उनले मन्त्री हेरफेरको विषय प्रधानमन्त्री ओलीको क्षेत्राधिकार भएको स्पष्ट पारे । प्रधानमन्त्रीले चाहेको बेला मन्त्री हेरफेर, पुनःगठन हुने उनको भनाइ थियो ।

उनले थाती रहेको एकता प्रक्रिया पनि छिट्टै निष्कर्षमा पुग्ने बताए । “एकताको काम सकेर छिट्टै प्रदेश तहको प्रशिक्षण कार्यक्रम आयोजना गर्ने तयारी गरिहेका छौं,” उनले भने ।