काठमाडौं । गायक दुर्गेश थापाले ‘ह्याप्पी तिहार चिसो बियर’ बोलको गीत युट्युबाट हटाउने तयारी गरेका छन् । गीतमा रहेका केही शब्द र सिन हटाएर राख्ने अथवा पूरै हटाउने त्यसबारे आफूले सोचिरहेको उनले बताए । 

“उजुरी परेपछि यसबारे गीत पूरै हटाउने अथवा करेक्सन गरेर पुनः अपलोड गर्ने भन्नेबारे सोचिरहेको छु,” दुर्गेशले बाह्रखरीसँग भने । उनले काम गर्ने क्रममा केही गल्ती भएको स्वीकार गरे । 

“काम गर्दै जाँदा गल्ती हुँदोरहेछ, यो गीतमा पनि केही कमजोरी भयो,” दुर्गेशले भने, “युवा पुस्ताको रुची अनुसार गीत आउँदा विरोध भयो । मैले त युवा पुस्तालाई लक्षित गरेर गाएको थिएँ ।”

उनले आफूलाई प्रहरीले सोमबार उजुरी परेको भन्दै खबर गरेको पुष्टि गरे । उजुरी गर्ने व्यक्तिसँग छलफल गरेर अगाडि बढ्ने योजना रहेको उनले जानकारी दिए । “मुद्दा मामिला गरेर समय खर्चिनुभन्दा सहमति गरेर अगाडि बढ्नु नै राम्रो होला भन्ने सोचेको छु,” उनले भने । 

उनको ‘ह्याप्पी तिहार चिसो बियर’ बोलको गीतमा बियर सँगै गाँजा लगायत शब्द समेटिएपछि उनको गीतको चर्को आलोचना हुँदै आएको छ । 

तीजमा उनले निकालेको 'बीच्च बीचमा' बोलको गीत लोकप्रिय भएको थियो । उक्त गीत लोकप्रिय भएपछि अहिले प्रदर्शनमा रहेको चलचित्र ‘छ माया छपक्कै’ले सोही लय र शैलीमा प्रचारका लागि दुर्गेशलाई गीत र भिडियो बनाउन लगाएको थियो ।