काठमाडौं । थाइल्यान्ड भ्रमणमा रहेको नेपाली राष्ट्रिय महिला भलिबल टोलीले दोस्रो मैत्रीपूर्ण खेलमा बैंकक युनिभर्सिटी थाइल्यान्डलाई पराजित गरेको छ ।
पहिलो पटक वैदेशिक प्रशिक्षणमा रहेको महिला टोलीले दोस्रो मैत्रीपूर्ण खेलमा बैंकक युनिभर्सिटी थाइल्यान्डलाई ३-१ को सेटमा पराजित गरेको हो ।
एफआइभीवी सेन्टरमा भएको खेलमा नेपालले पहिलो सेट २५-२१ ले जितेको थियो । निकै प्रतिस्पर्धात्मक दोस्रो सेट २४-२६ ले गुमाए पनि नेपालले तेस्रो र चौथो सेटमा पुनरागमन गर्दै नतिजा आफ्नो पक्षमा पारेको हो ।
तेस्रो सेट २५-१६ ले जितेको नेपालले चौथो सेट २५-१९ ले जितेको थियो । नेपाली टोलीले यसअघि पहिलो मैत्रीपूर्ण खेलमा जरानसानिवोङ युलाई ३-१ को सेटमा हराएको थियो ।
२२ दिने प्रशिक्षणमा लागि थाइल्यान्ड रहेको नेपाली टोलीले अब मंगलबार थाइल्याण्डको यू-२१ टोलीसँग मैत्रीपुर्ण खेल खेल्नेछ । यस्तै बिहिबार जापानको यू-२३ टिमसँग प्रतिस्पर्धा गर्नेछ ।
स्वदेश फर्किएपछि नेपाली टोलीले बंगलादेशमा आयोजना हुन लागेको सेन्ट्रल जोन भलिबल च्याम्पीयन्सीपमा सहभागिता जनाउनेछ । सेन्ट्रलजोनपछि टोलीले घरेलु मैदानमा आयोजना हुने १३ औं दक्षिण एसियाली खेलकुद प्रतियोगिता(साग) खेल्नेछ । दुबै प्रतियोगिताको तयारीका लागि टोलीलाई बैदेशिक प्रशिक्षणमा पठाइएको हो ।