काठमाडौं ।  गैरआवासीय नेपाली संघ (एनआरएनए) को अध्यक्षमा कुमार पन्त अगाडि देखिएका छन् । करिब डेढ सय मत गन्न बाँकी रहेको मतगणनास्थलमा रहेका एक प्रतिनिधिले बाह्रखरीलाई जानकारी दिएका छन् । त्यति बाँकी हुँदा पन्त करिब ३५ मतले अगाडि भएको जनाइएको छ ।   बुधबार राति विवादका कारण बिहीबार बिहान १० बजेबाट मतदान सुरु भएकोमा मतगणना अन्तिम चरणमा पुगेको हो । 

महाधिवेशनमा अध्यक्ष पदका लागि लोकतान्त्रिक खेमाबाट बेलायतमा बस्दै आएका  कुल आचार्य र बामपन्थी खेमाबाट जर्मनीमा बस्दै आएका पन्तले उमेदवारी दिएका थिए । बुधबार झण्डै ६ घण्टा मतदानका लागि प्रतिनिधिहरु लाइन लागिसकेपछि विद्युतीय भोटिङ्ग मेशिन बिग्रेको भनेर मतदान स्थगित गरिएको थियो । 

मतपेटिकामा मतपत्र खसाल्ने गरी विहीबार मतदान भएको थियो । महाधिवेशनमा विश्वभरीबाट करिब २ हजार ८ सय प्रतिनिधि सहभागी थिए ।  मंगलबार राष्ट्रपति विद्यादेवी भण्डारीले सम्मेलनको उद्घाटन गरेकी थिइन् । सम्मेलनको समापन प्रधानमन्त्री केपी शर्मा ओलीले हिजै गर्ने कार्यक्रम रहे पनि मतदान स्थगित भएकाले कार्यक्रम सरेको हो । 

समापन कार्यक्रम र आर्थिक प्रतिवेदन पास गर्ने कार्यक्रम कति बेला हुन्छ भन्ने जानकारी नभएको ती प्रतिनिधिले बताएका छन् ।