बेइजिङ्ग । चीन र सोलोमनबीच राजनीतिक सम्बन्ध स्थापना भएको एक महिना मात्रै भएपनि चीनले सोलोमनको तुलागी टापूलाई ७५ वर्षको लागि लिजमा लिने संझौता गरेको छ । यसलाई अमेरिकामाथिको झड्काका रुपमा लिइएको पाइएको छ । प्रशान्त महासागरको टापू देश सोलोमनको मन्त्रिपरिषद्को बैठकले अघिल्लो महिना चीनका लागि ताइवानसँगको सम्बन्ध अन्त्य गर्ने पक्षमा मतदान गरेको थियो । ताइवानका विदेशमन्त्री जोसेफ वुले सोही प्रकरणलाई लिएर पदबाट राजीनामा दिएका थिए ।
सेप्टेम्बरको दोस्रो साता सोलोमन र ताइवानको सम्बन्ध अन्त्य भएको हो । त्यसअघि पहिलो हप्ता सोलोमनका विदेशमन्त्री जेरेमिआह मैनेल ताइवानको भ्रमणमा गएका थिए । ताइवानले चाहिं सोलोमनले धोखा दिएको बताएका थियो । चीनले डलर डिप्लोमेसीका कारण ताइवानलाई अलगथलग गर्न प्रयासरत रहेको ताइवानले त्यतिबेला आरोप लगाएको थियो । ताइवानले सोलोमनको क्याबिनेटलाई पैसा दिएर प्रभावित पारेको आरोप लगाएको थियो ।
चीनको राष्ट्रिय दिवस १ अक्टोबर भन्दा अघि सोलोमन र ताइवानको सम्बन्ध तोडिएको हो । अमेरिकाले ताइवानसँग १९७९मा सम्बन्ध तोडेपछि चीनले अमेरिकासँग राजनीतिक सम्बन्ध जोडेको हो । तर, अमेरिकाका लागि ताइवान अझैपनि विशेष रहेको छ । चीनले ताइवानलाई आफ्नो भूभाग मान्छ भने ताइवानले भने आफूलाई सार्वभौमसत्ता सम्पन्न मुलुक मान्ने गरेको छ । प्रशान्त महासागरमा चीनको बढ्दो प्रभाव र त्यस क्षेत्रको सोलोमन पनि चीनको पक्षमा जानुले अमेरिकाका लागि भने टाउको दुखाइको विषय भएको जनाइएको छ ।
१४ अक्टोबरको दिन रेडियो न्युजिल्याण्डले पहिलो पटक तुलागी टापू चीनको एक कम्पनीले ७५ वर्षको लागि लिएको जनाए पनि त्यसको औपचारिक घोषणा भने गरिएको छैन । सोही विषयमा १६ अक्टोबरमा न्यूयोर्क टाइम्सले पनि समाचार बनाएको थियो । चीनले सोलोमनसँग सम्झौता गरेको विषयमा अष्ट्रेलिया पनि चिन्तित पाइएको छ । यसो भएमा चीन आफ्नो ढोकामै आइपुग्ने अष्ट्रेलियाले ठानिरहेको छ ।
सोलोमनको टापू तुलागी दुई वर्ग किमीमा फैलिएको छ । एएफपीका अनुसार यहाँको आवादी १,२०० रहेको छ । त्यहाँ जापानको नौसेना दोस्रो विश्व युद्धको समयमा राखिएको थियो । एएफपीले पनि चीन र सोलोमनबीच यो संझौता भएको जनाएको छ । (बीबीसीबाट)